मुगुमा यार्सागुम्बा टिप्न जाँदा लेक लागेर एक जनाको मृत्यु
काठमाडौं : मुगुको कार्मारोङ गाउँपालिकास्थित यार्सा संकलन क्षेत्रमा लेक लागेर एक जनाको मृत्यु भएको छ।
जुम्लाको पातारासी गाउँपालिका–३ का अन्दाजी २५ वर्षीय सुर्जबहादुर रावतको बिहीबार मृत्यु भएको प्रहरीले जनाएको छ।
यार्सागुम्बा टिप्न पाटनतर्फ जाँदै गर्दा लेक लागेर बिरामी भएपछि पुलु स्वास्थ्य चौकी मुगुमा ल्याइएका उनलाई थप उपचारका लागि मुगु जिल्ला अस्पतालतर्फ ल्याउँदै गर्दा उनको मृत्यु भएको डीएसपी वीरेन्द्र थापाले बताए।
जिल्ला अस्पतालमा पोष्टमार्टमपछि अन्त्येष्टिका लागि शव आफन्तले बुझिसकेको प्रहरीले जनाएको छ।
यार्सा टिप्न जाँदा हाईअल्टिच्युडका कारण लेक लागेर बिरामी हुने र तत्कालै उद्धार तथा उपचार नहुँदा बर्सेनि यार्सा पाटनहरुमा संकलकहरुले ज्यान गुमाउँदै आएका छन्।
गत वर्ष मात्र यार्सा टिप्न मुगुका पाटनहरुमा पुगेका ३ जनाको हिमपहिरोमा परेर मृत्यु भएको थियो। यो वर्ष मुगुम कार्मारोङ गाउँपालिकाले आगामी जेठ १५ गतेबाट यार्सा टिप्नका लागि मुगुका दुई दर्जनभन्दा बढी पाटनहरू खुल्ला गर्ने जनाएको छ।
वैशाख २७, २०८१ बिहीबार २१:१३:५० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
