अफगानिस्तानको टी–२० विश्वकप खेल्ने १५ सदस्यीय टोली घोषणा, १९ वर्षीय विकेटकिपर ब्याट्सम्यान इशाक पनि

एजेन्सी : अफगानिस्तानले अमेरिका र वेस्टइन्डिजमा हुने टी–२० विश्वकपका लागि राशिद खानको कप्तानीमा १५ सदस्यीय टोलीको घोषणा गरेको छ। अफगानिस्तानले १९ वर्षीय विकेटकिपर ब्याट्सम्यान मोहम्मद इशाकलाई टोलीमा समावेश गरेको छ। 

इशाकले यसै वर्ष टी–२० मा डेब्यु गरेका थिए र टी–२० विश्वकपको टिममा पनि स्थान बनाउन सफल भएका थिए। इशाक बाहेक करिम जनात र नूर अहमदलाई पनि टोलीमा स्थान दिइएको छ।

अफगानिस्तानले २० वर्षीय बायाँ हाते स्पिन अलराउन्डर नाङ्ग्याल खरोतीलाई पनि आफ्नो विश्वकप टोलीमा समावेश गरेको छ। उनले पनि इशाकजस्तै यसै वर्ष डेब्यु गरेका थिए। खरोतीले राशिद खान, मोहम्मद नाबी, मुजिब उर रहमान र नूर अहमदसँगै टोलीको स्पिन विभागलाई बलियो बनाउनेछन्। नवीन उल हक, फरीद अहमद र फजलहक फारुकीले फास्ट बलिङ आक्रमणको जिम्मा लिनेछन्। 

१५ सदस्यीय खेलाडीबाहेक सादिक अटल, हजरतुल्लाह जाजई र सलिम सैफी रिजर्भ खेलाडीमा परेका छन्।

अफगानिस्तानले जुन ३ मा युगान्डासँगको खेलबाट टी–२० विश्वकपमा आफ्नो अभियान सुरु गर्नेछ। दुई टोलीबीचको यो खेल गुयानामा हुनेछ। त्यसपछि टोलीले जुन ७ मा न्युजिल्यान्डसँग खेल्नेछ। 

अफगानिस्तानले १३ जुनमा पपुवा न्युगिनी र १७ जुनमा वेस्टइन्डिजसँग खेल्नेछ।

अफगान टिम 
रहमानउल्लाह गुरबाज (विकेटकीपर), इब्राहिम जद्रान, अजमातुल्लाह ओमरजाई, नजिबुल्लाह जद्रान, मोहम्मद इशाक, मोहम्मद नाबी, गुलबदिन नाइब, करीम जनात, राशिद खान (कप्तान), नांग्याल खरोती, मुजीब उर रहमान, नूर अहमद, नवीन उल हक, फजलहक फारुकी र फरीद अहमद मलिक अफगान टिममा रहनेछन्।  

वैशाख १९, २०८१ बुधबार १५:२६:४४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।