लुम्बिनी प्रादेशिक अस्पतालको नयाँ भवन बनाउन पुराना संरचना हटाइँदै, लागत छ अर्ब
बुटवल : बुटवलस्थित लुम्बिनी प्रादेशिक अस्पतालको नयाँ भवन निर्माणका लागि पुराना संरचना हटाउन थालिएको छ।
१२ तले अत्याधुनिक भवन निर्माणका लागि अहिले भइरहेका संरचना हटाउने काम भइरहेको हो। अस्पतालको पुराना ओपिडी वार्ड र आकस्मिक कक्ष रहेको भवन तथा हाल प्रशासनिक कक्ष रहेको भवन भत्काइएको छ।
आयोजनाका साइट इन्जिनियर रमेश शर्माले अबको २ हप्तामा साइट क्लियर हुने बताए। हटाइएका संरचनालाई अस्पतालको दक्षिणतर्फ रहेको बसपार्कसँग जोडिएको क्षेत्रमा राखिएको छ भने पुराना झ्याल, ढोका लगायतका फर्निचरजन्य सामग्रीलाई उत्तर-पश्चिमतर्फ अक्सिजन प्लानसँगैको खाली क्षेत्रमा डम्पिङ गरिएको छ।
संरचना हटाउँदा धुलो तथा वायु प्रदुषण कम गर्न पानी छर्किइएको साइट इन्जिनियर शर्माले जानकारी दिए। दिउँसोको समयमा सेवाग्राहीको आवागमनले पूर्ण क्षमतामा काम गर्न नमिले पनि साँझ र विहानको समयमा भने तीव्रताका साथ काम भइरहेको उनले बताए।
हाल ६५ जना कामदारबाट कम्तिमा दैनिक १० घण्टाका दरले काम गरिरहेका छन्। विहान ६/७ बजेदेखि रातको ९/१० बजेसम्म नै संरचना हटाउने काम भैरहेको उनको भनाइ छ।
‘हामीले दुई हप्ताभित्रै पूरानो संरचना हटाएर नयाँ संरचनाका लागि जग खन्न जमिन तयार पार्दैछौं,’ शर्माले भने, ‘अस्पतालका अन्य संरचनाको सुरक्षा तथा जग खन्ने कामका लागि सिट पाइलिङको तयारी भैरहेको छ।’
अस्पतालको नयाँ बन्ने भवन संरचना अनुसार २ तला अन्डरग्राउण्ड (जमिनमूनि) हुने भएकाले कम्तीमा साढे ७ मिटर गहिरो जग खन्ने काम हुने छ। उक्त क्रममा पूरानो संरचना र वरीपरिका जमिनमा असर हुन नदिनका लागि करिब ६ सय पाइल गाड्नुपर्ने इन्जिनियर शर्माले बताए।
पाइलिङका लागि २ वटा मेसिन ल्याएर काम भैरहेको उनले जानकारी दिए। त्यसका लागि छड बुन्ने लगायतका कामहरू भैरहेको बताउँदै शर्माले कम्तिमा ७ मिटरदेखि १३ मिटरसम्म गहिरो पाइलिङ (जमिनमा मेसिनले प्वाल पारेर पिल्लर गाड्ने काम) गर्नुपर्ने जानकारी दिए।
एक सय १४ वर्ष पुरानो बुटवलको लुम्बिनी प्रादेशिक अस्पतालको अत्याधुनिक संरचना सहितको १२ तले अस्पताल भवन निर्माणको लागि प्रदेश पूर्वाधार विकास प्राधिकरणले ६ अर्ब १८ करोड ७५ लाख रुपैयाँको लागतमा ठेक्का सम्झौता गरेको छ।
लुम्बिनी प्रदेश मातहत रहेको प्रदेश पूर्वाधार विकास प्राधिकरणले भारतीय निर्माण कम्पनी क्याप साइट आशिष रेलिग्रेट भेन्चरले नेपाली कम्पनीसँग संयुक्त रूपमा काम गर्ने गरी गत पुस २६ गते सम्झौता गरेको थियो। सम्झौता अनुसार २०८५ साल पुससम्म अस्पतालको भवन निर्माण सक्नुपर्नेछ।
अस्पतालका मेडिकल सुपरिटेन्डेन्ट डा. सुदर्शन थापाले बिरामीहरूको उपचारमा कुनै बाधा नपुग्ने गरी जोखिमरहित तरिकाले पुराना संरचनालाई मार्किङ गरेर हटाउने काम भैरहेको बताए। बुटवल उपमहानगरपालिका वडा नम्बर ९ मा रहेको ६ बिघा १२ कठ्ठा जग्गामा भवन निर्माण हुँदैछ।
प्रदेश पूर्वाधार विकास प्राधिकरणका प्रमुख कार्यकारी अधिकृत इन्जिनियर छविराज पोखरेलले भवन निर्माणपछि एउटा आधुनिक अस्पतालका लागि आवश्यक पर्ने सबै खाले सुविधासहितको क्षेत्रीय अस्पतालमा स्तरोन्नति गरिने बताए।
यस्तो हुनेछ नयाँ संरचना
अस्पतालको डिपिआर अनुसार भवनको अगाडिको भागमा अत्याधुनिक बहिरङ्ग सेवा (ओपिडी), आपतकालीन सेवा (इमर्जेन्सी), इनडोर सर्भिस कक्ष रहनेछन्।
ग्याष्ट्रो, न्यूरो, कार्डियोलोजी लगायतका सबै विशेषज्ञ सेवा एउटै भवनबाट सञ्चालन हुनेछन्। भवनको माथि हेलिप्याड रहनेछ भने हेलिप्याडबाट सिधै इमर्जेन्सीमा आउजाउ गर्न मिल्ने व्यवस्थित लिफ्टसमेत बन्नेछ।
क्यान्सर उपचारका लागि भने अन्डरग्राउन्डसहित पाँच तलाको अलग्गै भवन बन्नेछ। १२ तलाको नयाँ भवन निर्माणपछि हाल उपचारका लागि प्रयोगमा रहेका तीन वटा नयाँ भवनमा डाइग्नोष्टिक एन्ड रिसर्च, प्रसूति र महिला तथा बाल रोगको उपचारका लागि प्रयोग गरिनेछ।
पछिल्लो पाँच वर्ष यता मात्रै संघीय सरकारको लगानीमा दुई पटक गरी ५८ करोडको लागतमा भौतिक संरचना निर्माण गरिएका छन्। अस्पताल विकास समितिले पनि इमर्जेन्सी, ओपिडी, अन्तरङ्ग सेवा, फार्मेसी, अस्पताल परिसरभित्रको सडक र अस्पताल कम्पाउण्ड वाल निर्माण लगायतमा ३५ करोड बढी लगानी गरेको छ।
अस्पतालको इतिहास
तत्कालीन प्रधानमन्त्री श्री ३ चन्द्र शमशेर जबराको पालामा वि.सं. १९६७ फागुन १५ गते ६ शय्याबाट सुरू भएको यो अस्पताल लुम्बिनी क्षेत्रकै सबभन्दा पुरानो र ठूलो अस्पताल हो। सेन वंशीय राजा मणिमुकुन्द सेनको दरबार रहेको स्थान बुटवल फूलबारीबाट दुई जना भारतीय चिकित्सकबाट अस्पतालको सेवा सुरू गरिएको थियो।
३१ वर्ष बुटवल फूलबारीबाट सञ्चालन भएको अस्पताललाई १९९८ सालमा हाल रक्तसञ्चार गृह रहेको स्थानमा सारिएको थियो। हाल रहेको स्थानमा भने २०१६ सालमा भवन निर्माण गरी सारिएको थियो। हाल अस्पतालमा ५ सय २० शय्या छन्। दैनिक दुई हजारदेखि बाइस सयसम्म बिरामीहरू उपचारका लागि आउने अस्पतालमा सामान्य अवस्थामा पनि ७० प्रतिशत बढी बेडहरू बिरामीले भरिने गर्छन् ।
सरकारी तीन सय र अस्पताल विकास समितिमार्फत एक सय गरी चार सय बेडको मात्र स्वीकृति पाएको अस्पतालमा बिरामीहरूको अत्यधिक चापका कारण १ सय २४ बेड थप गरी ५ सय २४ बेडबाट बिरामीहरूलाई सेवा प्रदान भइरहेको छ।
अस्पतालका सूचना अधिकारी वरिष्ठ बाल रोग विशेषज्ञ डा. नेत्रबहादुर रानाले लुम्बिनी प्रादेशिक अस्पतालले लुम्बिनी प्रदेशका मात्र नभई अन्य प्रदेशका समेत गरी ४० लाख जनसङ्ख्यालाई स्वास्थ्य सेवा उपलब्ध गराउँदै आएको जानकारी दिए।
डा. रानाका अनुसार अस्पतालमा दैनिक रूपमा ओपिडीतर्फ एक हजार पाँच सयदेखि २ हजार र इमर्जेन्सीमा २ सयदेखि दुई सय ५० जनासम्म बिरामी आउँछन्।
हालैमात्र क्याथल्याब सेवा समेत संचालन गरिएको अस्पतालबाट मिर्गौलाको डायलाइसिस, प्लाष्टिक सर्जरी, ग्याष्ट्रो मेडिसिन, न्यूरो मेडिसिन, न्यूरो सर्जरी, युरो सर्जरी, इन्टेरेस्कोप, पीएनसीयू, पीआईसीयू, एनआइसीयु, बर्थिङ सेन्टर, नेत्र रोग, हाड जोर्नी तथा नसा रोग, दन्त, नाक, कान घाँटी, आँखा, मनोरोग लगायतका विशिष्टिकृत सेवा संचालनमा छन्।
वैशाख ८, २०८१ शनिबार ०८:३४:२५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
