एसएमएस फ्रेन्डसिप टी-२० मा नेपालले आज बरोडासँग खेल्दै

काठमाडौं : फाइनलमा स्थान पक्का गरिसकेको नेपालले आज भारतमा जारी एसएमएस फ्रेन्डसिप टी२० कप क्रिकेटको चौथो खेल खेल्दैछ।

बरोडा क्रिकेट एशोशियसनसँगको खेल गुजरातको भापीस्थित साई मेघपन स्पोर्ट्सलाइफ मैदानमा दिउँसो पौने एक बजे हुनेछ।

नेपालले यसअघि खेलेका तीनै खेल जितेर फाइनल पुगेको हो भने बरोडा तीनै खेलमा पराजय भोगेर फाइनलको रेसबाट बाहिरिसक्यो।

नेपालले पहिलो खेल गुजरातसँग खेलेको थियो। गुजरातलाई पहिलो खेलमा पराजित गर्दै विजयी सुरुवात गरेको नेपालले दोस्रो खेलमा बरोडालाई र तेस्रोमा पुनः गुजरातलाई हराउँदै ६ अंक सहित फाइनल पुगेको थियो।

गुजरात र बरोडाबीचको दुवै खेलमा गुजरातले बरोडालाई हराएर फाइनल पुगेको छ। त्यसैले आजको खेलको नतिजाले कुनै फरक पर्ने देखिँदैन।

डबल राउन्ड रोबिनको आधारमा भएको खेलको फाइनल भने आइतबार हुनेछ।

नेपालले ओमानमा हुने एसीसी प्रिमियर कपको तयारी स्वरूप यो सिरिज खेलेको हो। सिरिज सकेर नेपाल त्यहिँबाटै ओमान जानेछ।

चैत २३, २०८० शुक्रबार ०८:१४:०३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।