प्रधानमन्त्रीको जवाफप्रति चित्त बुझाएन कांग्रेसले, रविमाथि संसदीय छानबिन नगरे संसद अवरुद्ध गरिराख्ने

काठमाडौं : नेपाली कांग्रेसले पर्याप्त प्रमाण हुँदाहुँदै पनि सरकारले उपप्रधान तथा गृहमन्त्री रवि लामिछानेलाई कारबाहीको दायरामा ल्याउन नखोजेको भन्दै संसदीय छानबिन समितिको माग गरेको छ।

सहकारीका बचतकर्ताको रकम हिनामिना प्रकरणमा लामिछानेको संलग्नताबारे प्रधानमन्त्री पुष्पकमल दाहाल प्रचण्डले दिएको जवाफ चित्तबुझ्दो नभएको भन्दै प्रमुख प्रतिपक्षी कांग्रेसले संसदीय समिति गठन गरी छानबिन गर्न माग गरेको हो।

यदि संसदीय समिति गठन गरेर निष्पक्ष कारबाही नगरे सदन अवरुद्ध गरिराख्ने चेतावनी कांग्रेसले दिएको छ।

मंगलबार प्रतिनिधि सभा बैठकमा गृहमन्त्री लामिछाने मुछिएको सूर्यदर्शन सहकारीको पैसा अपचलनमा प्रधानमन्त्री प्रचण्डले सदनमा स्पष्टीकरण दिएका थिए। प्रचण्डले उक्त प्रकरणमा प्रहरीले नै रविलाई प्रमाण नभेटिएकाले अनुसन्धान गर्नु नपर्ने गरी क्लिन चिट दिएको र रविले लिएको एक करोड रुपैयाँ फर्छ्यौट भैसकेको जानकारी सदनलाई गराउँदै उनीमाथि छानबिन गर्नु नपर्ने बताएका थिए।

प्रधानमन्त्रीको जवाफपछि कांग्रेसका सांसदले उठेर विरोध जनाएका थिए। कांग्रेस संसदीय दलका प्रमुख सचेतक रमेश लेखकले प्रधानमन्त्रीको जवाफमा चित्त नबुझेको र उनी समेत अँध्यारोमा परेको पाइएको बताए।

‘प्रधानमन्त्रीलाई नै गलत जानकारी दिइँदैछ। गलत सूचना दिइँदैछ। प्रधानमन्त्री नै अँध्यारोमा हुनुहुन्छ भने अब यो कुराको निष्पक्ष छानबिन होला? जो कुरा प्रधानमन्त्रीलाई जानकारी छैन। प्रमाण छैन भन्नुभयो। पोखरा महानगरपालिकाले सूर्यदर्शन सहकारीबाट गोर्खा नेटवर्क प्रालि लामिछानेको नाममा पुलेसो कर्जा नम्बर खडा गरी खातामार्फत पेस्की फछ्यौट गरेको भन्ने प्रमाण होइन?’ लेखकले प्रश्न गरे।

लेखकले प्रचण्डको स्पष्टीकरणमा चित्त नबुझेको बताए।

‘प्रधानमन्त्रीको जवाफबाट कांग्रेसको चित्त बुझ्ने ठाउँ पटक्कै भएन बरु थप चिन्ता भयो।’ संसद्मा गोकुल बास्कोटा, जनार्दन शर्मा लगायतले आफूमाथि प्रश्न उठ्दा संसदीय अभ्यास गर्दै छानबिन भएको उदाहरण दिँदै लेखकले भने, ‘सरकारलाई आग्रह गर्न चाहन्छ। तपाईं प्रमाण छैन भन्दै हुनुहुन्छ, म पर्याप्त छ प्रमाण भन्छु। यही सदनभित्र छानबिन समिति गठन गरौं। अनि स्पष्ट हुन्छ।’

चैत ६, २०८० मंगलबार १५:४२:४३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।