महिला टिमकी पहिलो कप्तान नेरीले लिइन् सन्यास

काठमाडौं : नेपाली राष्ट्रिय क्रिकेट टिमकी पूर्व कप्तान नेरी थापाले सन्यास लिएकी छन्।

सामाजिक सञ्जाल फेसबुकमार्फत नेरीले आफ्नो १७ वर्षीय क्रिकेट करियरलाई विश्राम दिएको घोषणा गरेकी हुन्। उनी नेपाली महिला क्रिकेट टिमकी पहिलो कप्तान हुन्।

सामाजिक सञ्जाल फेसबुकमा सोमबार राति नेरीले लेखेकी छन् ‘खेलबाट सन्यास लिएको हो। तर सम्झनाबाट होइन। मेरो यात्रामा मलाई साथ दिने र उत्प्रेरित गर्ने सबैलाई म धन्यवाद दिन्छु। म विशेष गरी मेरो परिवारलाई धन्यवाद दिन्छु जसले मलाई यात्रामा सधैं साथ दिनुभयो। मलाई आशा छ यो यात्रा क्रिकेटमा संन्यास होस् तर जीवनमा होइन।’

बाँकेबाट राष्ट्रिय क्रिकेटमा पाइला अघि बढाएकी नेरीको कप्तानीमा नेपालले सन् २००७ मा एसीसी महिला च्याम्पियनसिप खेलेको थियो। त्यो नै महिला सिनियर क्रिकेट टिमले खेलेको अन्तर्राष्ट्रिय प्रतियोगिता हो।

नेरीको कप्तानीमा यु–१९ महिला राष्ट्रिय टिमले २००८ र २०१० एसीसी यु–१९ महिला च्याम्पियनसिपको उपाधि पनि जितेको थियो। नेरी घरेलु क्रिकेटमा शतक बनाउने पहिलो महिला खेलाडी पनि हुन्।

उनले तत्कालीन क्षेत्र नम्बर ५ बाट खेल्दै काठमाडौं विरुद्ध शतक बनाएकी थिइन्। २०७० सालमा शतक बनाउँदा उनले काठमाडौंविरुद्ध १२१ रन जोेडेकी थिइन्।

चैत ६, २०८० मंगलबार ०८:०७:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।