फिल्म सुटिङ स्थलबाटै हुनथाल्यो दृश्य लिक, ‘पुजार सार्की’ मा नाच्दै गरेको अभिनेता आर्यनको भिडियो भाइरल भो

काठमाडौँ : सुटिङ स्थलबाट फिल्म ‘पुजार सार्की’ का अभिनेता आर्यन सिग्देल नाचिरहेको भिडियो बाहिरिएको छ। आर्यन नाचिरहेको २५ सेकेन्डको भिडियो बाहिरिएपछि फिल्मका निर्देशक दिनेश राउतले आफ्नो टिम तनावमा रहेको जानकारी दिए।

उनका अनुसार यो लुक्स कुनै अवसर पारेर सार्वजनिक गर्ने तयारी गरिएको थियो। तर समय अगावै एक्कासि भिडियो नै भाइरल भएपछि आफ्नो टिम तनावमा रहेको उनको भनाई छ। दिनेशले कुराकानीमा यो गीतको भिडियो आर्यनको कोही फ्यानले सेटमै खिचेर अपलोड गरेको दाबी गरे।

तर फिल्मको अर्का मुख्य कलाकार प्रदीप खड्काले नै २४ सेकेन्ड लामो भिडियोको युट्युब लिङ्क शेयर गर्दै ‘पुजार सार्की लिक भयो। मैतैलाई पत्ता लगाउनुस्’ भनेर लेखेकाले फिल्मको निर्माण अगाडि नै हल्ला गराउन निर्माण टिमले लिक गराएको देखिन्छ।

सार्वजनिक भिडियोमा पञ्चेबाजामा छमछम नाचिरहेका आर्यनले टुप्पी पालेका छन्। ढाकाटोपी लगाएका छन् आर्यनको लुक्स हेर्दा उनी यो फिल्ममा पुजारीको भूमिकामा रहेको अनुमान लगाउन सकिन्छ।

कास्की जिल्लाको पोखरा नजिकै पर्ने कास्कीकोटमा छायाङ्कन चलिरहेको यस फिल्ममा आर्यनका अलवा प्रदीप खड्का, पल शाह,अन्जना बराइली र परीक्षा लिम्बुको प्रमुख भूमिकामा अभिनय गर्दैछन्। जातीय विभेद विरुद्ध समाजका तीन पात्रहरूले गर्ने साझा सङ्घर्षको कथा रहेको यो फिल्मलाई विकास सुवेदीले लेखेका छन्।

सङ्गीतकार सुवास भुसालले निर्माण गरेको यो फिल्ममा उनकै सङ्गीत रहेको छ। फिल्ममा हर्क साउद, बि. पाण्डे, दिनेश राउत र गणेश शाहीको गीत रचना समावेश रहेछ भने प्रकाश सपूत, शान्ति श्री परियार र केतन क्षेत्रीले गीतमा स्वर दिएका छन्। 

चैत २, २०८० शुक्रबार १५:०८:१२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।