हलमा चल्दाचल्दैको फिल्म उपहारको खाडीमा भेटौला गीत सार्वजनिक
काठमाडौँ : फिल्म रिलिज भएको तेस्रो दिन ‘उपहार’को गीत ‘खाडीमा भेटौँला’ सार्वजनिक गरेको छ। शुक्रवार रिलिज भएको फिल्मले दैनिक ४० शोज् पाइरहेको छ। मङ्गलवार ओएसआर डिजिटलमार्फत सार्वजनिक भएको गीतको म्युजिक भिडियोमा १२ कक्षा पास गरेपछि अब के गर्ने होला भनेर अन्यौलता परेका युवा पुस्ताको भाव समेटिएको छ।
गीतमा मोहन नेपालीको स्वर, अर्जुन पोखरेलको सङ्गीत र प्रमोद ढुङ्गानाको शब्द रहेको छ। गीतको भिडियोमा रेखा थापा, मुकुन भुसाल र राइडर प्रशान्त समेत फिचर्ड छन्।
ज्ञानेन्द्र देउजाद्वारा निर्देशित फिल्मले मिश्रित प्रतिक्रिया पाइरहेको छ। हलमा अहिले अगस्त्य र रङ्गेली समेत प्रदर्शनमा छन्। यी दुई फिल्मको तुलनामा उपहारले उच्च शोहरु पाइरहेको छ।
रेखा फिल्मस् र कपनगढी सिनेमा प्रालिको व्यानरमा रेखा थापा प्रस्तुतिकर्ता रहेको फिल्ममा रेखा, पूजा शर्मा, मुकुन भुसाल, बेनिशा हमाल, तेज गिरी, समर्पणजंग कार्की, सुषमा कार्की, शिशिर राणा, अंशु महर्जन, विनोद पौडेल, आशा भुसाल, शोभारस घिमिरे, मञ्जु श्रेष्ठ, कमल भट्ट, राइडर प्रशान्त र सरिता राजोपाध्यायलगायतको अभिनय रहेको छ।
बलराम शाही ठकुरी कार्यकारी निर्माता रहेको फिल्मका निर्माता सुलभ प्रतीक र समीक्षा देउजा हुन्। फिल्ममा विष्णु कल्पित घिमिरेको छायाङ्कन, मित्र डी गुरुङको सम्पादन, अनुपम गौतमको भीएफएक्स, रोशन श्रेष्ठको द्वन्द्व, अर्जुन पोखरेल र बाबुल गिरीको सङ्गीत, सुलक्षण भारतीको कथा, भारतीका साथै अभिमन्यु निरवी र माधव शर्माको पटकथा तथा संवाद छ।
फिल्मको वितरण उपत्यका भित्र रिच इन्टरटेनमेन्ट र उपत्यका बाहिर एफडी कम्पनीले गरेको छ।
फागुन २९, २०८० मंगलबार १४:३८:३३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
