अनिता केसीले प्रीतिको स्थानमा आईलिग खेल्ने

काठमाडौं : मिडफिल्डर अनिता केसीले प्रीति राईको स्थानमा भारतीय महिला आईलिग खेल्ने भएकी छिन्।

नेपाल राष्ट्रिय टोलीकी सदस्य प्रीति घाइते भएसँगै तीन महिना मैदान बाहिर हुनेछिन्। प्रीति भारतीय आईलिगमा किक स्टार्सबाट खेल्ने गरेकी छिन्।

तर, घाइते भएपछि किक स्टार्सले नेपाली राष्ट्रि टोलीबाट खेलिरहेकी अनितालाई अनुबन्ध गरेको हो। किक स्टार्सले खेल्ने बाँकी तीन खेलमा अनिताले खेल्नेछिन्।

अनिताले पहिलो पटक आईलिग खेल्न उत्साहित रहेको बताइन्।

‘पहिलो पटक आईलिग खेल्ने अवसर पाएको छु। त्यसका लागि निकै उत्साहित छु,’ अनिताले भनिन्, ‘प्रीति घाइते भएपछि अवसर पाएको हो। उसको अभाव महसुस हुन नदिने प्रयास गर्छु।’

किक स्टार्सले ओडिसा एफसी, सेथु एफसी र गोकुल केरेलासँग खेल्न बाँकी छ। तीन खेल बाँकी रहँदा ६ जित, दुई बराबर र एक हारसहित २० अंक जोडेर तेस्रो स्थानमा छ।

यस सिजन सात खेल खेलिसक्दा प्रीतिसँगै दीपा शाहीले किक स्टार्सको लागि शानदार प्रदर्शन गरेकी छन्। १० खेल खेलिसकेको गोकुलम केरेला २३ अंकसहित शीर्ष स्थानमा छ।

यस सिजन आई लिगमा ६ नेपाली खेलाडीले खेलेका छन्। प्रीति र दीपासँगै राष्ट्रिय महिला टोलीकी कप्तान एञ्जिला तुम्बाप्पो सुब्बा, गीता राना, रश्मिकुमारी घिसिङ र अमृता जैसीले खेलेका हुन्।

एञ्जिला र गीता सेथु एफसीमा छन्। रश्मि र अमृता स्पोर्ट्स उडिसामा आवद्ध छन्।

फागुन २५, २०८० शुक्रबार ११:४३:१४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।