त्रिकोणात्मक टी -२० आई सिरिज : आज नामिबिया र नेदरल्याण्ड्स खेल्दै, टियू मैदानमा नि:शुल्क खेल हेर्न पाइने

काठमाडौं : त्रिकोणात्मक टी -२० आई सिरिज अन्तर्गत आज नामिबिया र नेदरल्याण्ड्सबीच खेल हुँदै छ।

खेल बिहान साढे ११ बजेबाट त्रिवि क्रिकेट मैदानमा सुरू हुनेछ। आजकै खेलबाट सिरिजको अर्को फाइनलिस्ट टोली तय हुने भएकाले पनि यो खेललाई विशेष रूपमा हेरिएको छ।

शनिबार भएको खेलमा नेपालले नेदरल्याण्डस्लाई हराएर फाइनल पुगिसकेको छ। चारमध्ये २ खेल जितेको नेपाल अंक तालिकाको दोस्रो स्थानमा रहँदै सिरिजको फाइनलमा पुगेको हो।

नेपाल र नेदरल्याण्ड्सको समान ४/४ अंक छ।

तेस्रो स्थानमा रहेको नामिबिया र पहिलो स्थानमा रहेको नेदरल्याण्ड्सबीचको खेलबाट जित्ने टिमले मंगलबार नेपालसँग फाइनल खेल खेल्नेछ।

यसैबीच, नेपाल क्रिकेट संघ (क्यानले) आजको खेल दर्शकका लागि निःशुल्क हेर्न पाउने व्यवस्था गरेको जनाएको छ। त्रिवि मैदानमा खेल हेर्न आउने दर्शकले टिकट काट्न नपर्ने जानकारी क्यानले सामाजिक सञ्जालमार्फत गराइसकेको छ।

यसअघिका भएको सिरिजको सबै खेल प्रत्यक्ष हेर्न दर्शकहरूले टिकट लिनुपर्ने व्यवस्था थियो।

फागुन २०, २०८० आइतबार ०७:४६:३८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।