‘सरकार र प्रधानमन्त्रीले गरिराखेको प्रयत्नले गर्दा क्रिकेटमा राम्रो रिजल्ट आएको छ’

काठमाडौं : माओवादी केन्द्रका उपमहासचिव वर्षमान पुनले गणतन्त्रको पछिल्लो पन्ध्र वर्षको समयावधिमा देशमा स्वास्थ्य, शिक्षा, खेलकुद, भौतिक पूर्वाधार निर्माण लगायतका क्षेत्रमा तीब्र विकास भएको बताएका छन्।

शनिबार काठमाडौंमा प्रथम शहीद स्मृति बागमती प्रदेश रनिङ शिल्ड प्रतियोगिताको खेलाडी सम्मान तथा शहीद वेपत्ता परिवार सम्मान कार्यक्रममा उपमहासचिव पुनले देशमा गणतन्त्र आएपछि तुलनात्मक रुपमा शिक्षा, स्वास्थ्य, खेलकुद, पूर्वाधार लगायतका क्षेत्रमा तीब्र विकास भएको दाबी गरेका हुन्।

‘हामीले ३० वर्षको पञ्चायत हेर्यौं, त्यसपछिको राजतन्त्रात्मक संसदीय व्यवस्था पनि हेर्यौं। त्यसयताको व्यवस्थामा भएका कामलाई तुलनात्मक रुपले हेर्यौं भने शिक्षा, स्वास्थ्य, भौतिक पूर्वाधार, खेलकुद सबै क्षेत्रमा तीब्र विकास भएको छ। त्यो नेपालीको आकांक्षा र आवश्यकता अनुसार अझै भएको छैन,’ पुनले भने।

उनले खेलकुदको विकासमा वर्तमान सरकारले प्राथमिकता दिएकै कारण क्रिकेट, भलिबल र महिला फुटबलमा राम्रो नतिजा आएको दाबी गरे।

उनले भने, ‘समग्र खेलकुदको विकासको लागि प्रधानमन्त्री र सरकारले गरिराखेको प्रयत्नमा क्रिकेटमा राम्रो रिजल्ट आएको छ। भलिबलमा राम्रो नतिजा आएको छ। खासगरी महिला फुटबलमा राम्रो परिणामहरु देखिएको छ। सरकारले खेल क्षेत्र र खेलाडिलाई प्रोत्साहन गरिराखेको छ।’

उनले खेल क्षेत्रलाई देशको प्रतिष्ठा उँचो बनाउने माध्यमको रुपमा सरकारले प्राथमिकतामा राखेर काम गरिरहेको बताए।

फागुन १९, २०८० शनिबार २१:०१:३५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।