७१ वर्षीय वृद्धलाई जंगलमा लगेर हत्या, रसुवाका भुषाल दम्पत्ती बाइपासबाट पक्राउ
![७१ वर्षीय वृद्धलाई जंगलमा लगेर हत्या, रसुवाका भुषाल दम्पत्ती बाइपासबाट पक्राउ](https://ukeraa.prixacdn.net/media/albums/hatya_MSElh0W3NT.jpg )
नुवाकोट : किस्पाङ गाउँपालिका बस्ने रसुवा उत्तरगया गाउँपालिका-३ डाँडागाउँ घर भएका ७१ वर्षीय भुन्टे भन्ने टेकप्रसाद भट्टको हत्या गरेको आरोपमा प्रहरीले एक दम्पत्तीलाई पक्राउ गरेको छ।
पक्राउ पर्नेहरूमा रसुवाको कालिका गाउँपालिका-२ धैबुङका ४१ वर्षीय अनिल भुषाल र उनकै श्रीमती ३१ वर्षीया दिपा भट्ट भुषाल रहेका छन्।
किस्पाङ गाउँपालिका-५ खत्रीकुना जंगलमा टेकप्रसाद भट्ट मंगलबार बिहान मृत अवस्थामा फेला परेको घटनाको अनुसन्धानमा घटनामा संलग्न भएको आरोपमा उनीहरूलाई पक्राउ गरिएको जिल्ला प्रहरी कार्यालय नुवाकोटले जनाएको छ।
कार्यालयका अनुसार भुषाल दम्पत्ती काठमाडौं महानगरपालिका-१६ बालाजु, बाइपासमा भएकाले उनीहरूलाई त्यहिँबाट पक्राउ गरेर नुवाकोट ल्याइएको हो।
उनीहरूले विगतको रिसईवीको कारणले भट्टलाई किस्पाङ गाउँपालिकाको खत्रिकुना जंगलमा लगेर दाउरा प्रहार गरी हत्या गरेको प्रारम्भिक अनुसन्धानको क्रममा खुल्न आएको प्रहरीले जनाएको छ।
उनीहरू उपर जिल्ला अदालत नुवाकोटबाट सात दिन म्याद थप अनुमति लिई प्रहरीबाट थप अनुसन्धान भइरहेको छ।
फागुन १९, २०८० शनिबार ०७:५८:३५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।