‘हात्तीछाप’मा छुस्स देखिँन पाउँदा पनि दंग हुने बेनिशा ‘उपहार’मा किन उदास?

काठमाडौं : अभिनेत्री बेनिशा हमाल अभिनित फिल्म ‘उपहार’ प्रदर्शनको तयारीमा छ। अर्को साताबाट प्रदर्शनमा आउन लागेको फिल्मको प्रचारमा निर्माण टिम खटिइरहेको छ। 

फिल्मकी मुख्य अभिनेत्री रेखा थापा पहिलो सन्तान जन्माएर अमेरिकामा छिन्। एक महिनाअघि अमेरिका पुगे पनि उनी डिजिटल माध्यमबाट फिल्मको प्रचारमा खटिएकी छिन्। तर उनको मिहिनेतले मात्र प्रचारको लय मिलिरहेको देखिएन। 

फिल्मको प्रदर्शन मिति एक साता मात्रै बाँकी रहेकाले अर्की अभिनेत्री पूजा शर्मा फिल्म प्रमोसनमा दौडिन थालेको देखिन्छ।तर फिल्मकी मुख्य अभिनेत्री बेनिशा भने भारतमै अल्झिएकी छन्।

यतिबेला उनी हिन्दी फिल्म ‘दुर्गम’को सुटिङमा व्यस्त छिन्। बेनिशाले यताको उपहार भन्दा उताको बढी चिन्ता गरेको देखिन्छ। उनले सामाजिक सञ्जालमा सेयर गरेको तस्विरमा समेत उपहार भन्दा ‘दुर्गम’को सुटिङ सेट बढी छ।

यसअघिको फिल्म ‘हात्तीछाप’मा छुस्स अभिनय गर्दा दंग परेकी बेनिशा प्रचारमै खटिएकी थिइन्। तर आफ्नो मुख्य भूमिका रहेको फिल्म प्रदर्शनमा आउन लाग्दा उनी तातेकी छैनन्। 

जे होस्, निर्माण टिमसँग झगडै परे पनि आफ्नो कामको त प्रचार गर्नैपर्छ है बेनिशाजी। नत्र त पछि परिएला! यो त हाम्रो सुझाव न हो, बाँकी आफ्नै मर्जी।

फागुन १६, २०८० बुधबार १६:३३:५२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।