रुस–युक्रेन युद्धमा मृत्यु भएका नेपालीहरूको शव ल्याउने परराष्ट्रमन्त्री साउदको आश्वासन सुनेर फर्किए परिवार

काठमाडौँ : परराष्ट्रमन्त्री एनपी साउदले रसियन सेनामा भर्ती भएकाहरूलाई नेपाल फिर्ता ल्याउन पहल भइरहेको बताएका छन्। रुसी सेनामा भर्ती भई युक्रेन युद्धमा मृत्यु भएका नेपालीका परिवारसँगको भेटमा उनले ज्यान गुमाएका युवाहरूको शव ल्याउनेदेखि परिवारलाई उचित क्षतिपूर्ति दिने विषयमा सरकार गम्भीर रहेको बताएका थिए।

साउदले शवहरू ल्याउन रसियन सरकारसँग पहल भइरहेको बताउँदै रसियन सेनामा रहेका नेपाली युवाहरूलाई फिर्ता ल्याउन समेत पहल भइरहेको बताए।

‘रसियन सेनामा भर्ती भएका नेपालीहरू जो दिवङ्गत भएका छन्, उनीहरूको पार्थिव शरीरलाई नेपाल कसरी ल्याउन सकिन्छ भन्नेबारे सरकारले छलफल अगाडि बढाएको छ। रसियन सेनामा रहेका २ सय ४५ जनाका परिवारहरूले परराष्ट्र मन्त्रालयको कन्सुलर डिपार्टमेन्टमा आवेदन दिनुभएको छ। अझै कोही छुट्नु भएको छ भने उहाँहरुलाई हामीले वडा, पालिकाका माध्यमबाट अनलाइनमै आवेदन दिन भनेका छौँ।’

उनले कोही रसियन सेनामा भर्ती भएको भए सम्बन्धित व्यक्तिको  पासपोर्ट नम्बर, नागरिकता नम्बर, नाम ठेगाना र पठाउने मान्छे लगायत सकिने जति विवरण पठाउन समेत आग्रह गरेका थिए।

‘यसरी रसियन तथा विभिन्न जोखिमयुक्त देशहरूमा गएका युवाहरूको पीडा नै सरकारको पीडा हो। सरकारले मान्यता नदिएका जोखिमपूर्ण ठाउँहरू, युद्ध भइरहेको ठाउँहरूमा रोक्न आग्रह गर्दै गएका भए  फिर्ताका लागि मन्त्रालयलाई आवेदन दिन सकिन्छ’ उनले भने।

नेपालसँग सम्झौता भएका बाहेकका देशमा भर्ती हुन नजान आग्रह गर्दै साउदले सरकारी कामकाज, रुसी सरकारको छात्रवृत्ति तथा पेसा व्यवसायमा संलग्न बाहेकले रुस जाँदा परराष्ट्र मन्त्रालयले जारी गर्ने ‘नो अब्जेक्शन सर्टिफिकेट’ अनिवार्य लिनसमेत आग्रह गरेका थिए।

फागुन १५, २०८० मंगलबार २२:०१:०६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।