धेरै मदिरा नखानू भन्दै नातिलाई सम्झाएका थिए, चिर्पटले हानेर बाजेको हत्या गरे
काठमाडौं : रूकुम पश्चिममा बाजेको हत्या गरेको आरोपमा नाति पक्राउ परेका छन्।
रुकुम पश्चिमको मुसिकोट नगरपालिका -१२ का ५१ वर्षीय हस्तराम खड्काको हत्या आरोपमा उनका नाति २३ वर्षीय डिल्लीराम खड्कालाई पक्राउ गरिएको प्रहरीले जनाएको छ।
शुक्रबार बिहान साढे ६ बजेतिर जुम्लाबाङ बुगेरी सडक खण्डस्थित त्रिवेणी तर्फ जाने सडकको छेउमा हस्तराम मृत फेला परेका थिए। त्यसपछि जिल्ला प्रहरी प्रवक्ता प्रहरी निरीक्षक धर्मेन्द्र खड्काको कमाण्डमा खटिएको टोलीले डिल्लीरामले लगाएको चप्पलमा रगत देखेपछि सोधपुछका लागि उनलाई दिउँसो नियन्त्रणमा लिएको थियो।
सोधपुछका क्रममा नाति डिल्लीरामले नै बाजे हस्तरामको हत्या गरेको स्वीकार बयान प्रहरीसमक्ष गरेको इन्स्पेक्टर खड्काले जानकारी दिए।
‘बाजेले नातिलाई किन यसरी रक्सी खान्छस् भनेर सम्झाउन खाजेपछि भनाभन भएको र त्यही क्रममा नातिले बाजेलाई ढकलेर लडाएपछि दाउरा प्रहार गरी हत्या गरेको खुलेको छ,’ प्रहरी निरीक्षक खड्काले भने ‘मदिराले मातेको नातिलाई सम्झाउन खोज्दा उनकै आक्रमणबाट बाजेको हत्या भएको खुलेको छ।’
बिहीबार राति सामूहिक रूपमा गाउँलेहरूले दाउरा बालेर आगो तापेका थिए। आगो तापेर सबै घर तर्फ लागेपछि हस्तरामले आफ्नो नातिलाई धेरै रक्सी नखान भनी सम्झाउन खोजेका थिए।
त्यसपछि उनी आक्रोशित भएर बाजेलाई सुरुमा धकेलेर लडाएको र पछि बल्दै गरेको दाउरा प्रहार गरेको इन्स्पेक्टर खड्काले बताए।
फागुन १२, २०८० शनिबार १६:११:२७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
