उच्च शिक्षामा नेपालबाट हुँदै आएको आर्थिक बहाव रोक्नुपर्छ : प्रधानमन्त्री

काठमाडौं : प्रधानमन्त्री पुष्पकमल दाहाल प्रचण्डले उच्च शिक्षा आर्जनका लागि नेपालजस्ता दक्षिणी एशियाली मुलुकबाट हुने ‘आर्थिक बहाव’ रोक्नुपर्ने बताएका छन्।

बिहीबार भारतीय विश्वविद्यालय संघ(एआइयु)–उत्तर क्षेत्रका उपकुलपतिहरूको बैठक एवं नेपाल–भारत उच्च शिक्षा शिखर सम्मेलनको उद्घाटन समारोहलाई सम्बोधन गर्दै प्रधानमन्त्रीले वहुसंख्यक युवा र उनीहरूसँग सम्बन्धित स्रोतहरू स्वदेशमै राख्न पहल गर्नुपर्नेमा जोड दिए।

‘शिक्षाका लागि नेपालजस्ता मुलुकबाट ठूलो आर्थिक बहाव हुने गरेको छ। यो प्रवृत्ति अब उल्टो हुनुपर्छ,’ प्रधानमन्त्री प्रचण्डले भने्, ‘हामीले विश्वव्यापी रूपमा अवसर खोज्नेहरूका लागि अनुकूल हुने वातावरण सिर्जना गर्नुपर्छ।’

उनले उच्च शिक्षाको अन्तर्राष्ट्रियकरण बारेमा पुनः मूल्यांकन गर्नुपर्ने आवश्यकता औंल्याए।

विश्वव्यापी शक्तिहरूले ल्याएका चुनौतिहरुसँग शैक्षिक क्षेत्रले संघर्ष गरिरहनु परेको उल्लेख गर्दै प्रधानमन्त्री प्रचण्डले उच्च शिक्षा र सीपका लागि ठूलो स्रोतलगायतका कारण उत्तरका विश्वविद्यालयमा विद्यार्थी र विद्वानहरू आकर्षित हुने पछिल्लो समयको प्रवृत्ती देखिएको बताए।

‘उच्च शिक्षाको सन्तुलन विश्वव्यापीरुपमा उत्तरतिर झुकेको देखिन्छ,’ प्रधानमन्त्रीले भने, ‘महँगो बजेटका कारण अन्तर्राष्ट्रिय विद्यार्थीहरूलाई उत्तरका शैक्षिक प्रणालीहरूले आकर्षित गरेपनि यो अवस्था लामो समयसम्म यस्तो अवस्था नरहन सक्छ।’

फागुन ३, २०८० बिहीबार १४:१२:१७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।