नेपालमा ‘भ्यालेन्टाइन डे’ मनाउन भारतबाट ९० प्रतिशत गुलाफ आयात

काठमाडौं : १४ फेब्रुअरीमा मनाइने ‘भ्यालेन्टाइन डे’ अर्थात् ‘प्रेम दिवस’ पछिल्लो समय नेपालमा पनि मनाउन थालिएको छ। पश्चिमा देशहरूबाट आएको भ्यालेन्टाइन डे युवा पुस्तामा लोकप्रिय छ।

आफन्त होस् वा मन परेको मानिस आफ्नो नजिकै भए भेटेर रातो गुलाफ र विभिन्न उपहार दिएर शुभकामना आदानप्रदान गरिन्छ भने टाढा भए इमेल, च्याट, मोबाइलमा एसएमएस गरी पनि ‘भ्यालेन्टाइन डे’ मनाउने चलन छ।

प्रेम व्यक्त गर्नका लागि प्रयोग गरिने सामान खरिद गर्न गिफ्ट पसलहरूमा युवायुवतीहरूको भीड देखिन्छ। काठमाडौँका हरेक रेस्टुरादेखि पसल सजिसजाउ गरिएका छन्। युवा पुस्तामा ‘भ्यालेन्टाइन डे’ को लोकप्रियता बढेसँगै यो दिवस हप्ता भरि मनाउने गरिएको छ।

फेब्रुअरी ७ मा ‘रोज–डे’ बाट सुरू हुन्छ। गुलाफ दिने, त्यसपछि प्रस्ताव राख्ने, त्यसपछि चकलेट दिने, टेडी दिने, वाचा गर्ने, अँगालो ‘हग’ गर्ने र आखिरमा प्रणय दिवस मनाइने गरिन्छ।

‘भ्यालेन्टाइन डे’ मनाउँदा एक अर्कालाई सप्ताहव्यापी रूपमा नै महँगो उपहार दिने चलन बनेको छ।

फ्लोरिकल्चर एसोसिएसन नेपालले यस वर्ष तीन लाख ५० हजार स्टिम गुलाफको माग रहेको जनाएको छ। एसोसिएसनका अध्यक्ष मीनबहादुर तामाङले कुल मागमध्ये १० प्रतिशत आन्तरिक उत्पादन र ९० प्रतिशत गुलाफ भारतबाट आयात गर्नु परेको बताए।

माग अनुसार स्वदेशमा उत्पादन हुन नसक्दा विगतका वर्षमा जस्तै यस वर्ष पनि भारतबाट गुलाफ ल्याइएको उनको भनाइ छ। उनले यसवर्ष रातो गुलाफ प्रतिस्टिम ८० रूपैयाँदेखि एक सयसम्म पर्ने जानकारी दिए।

अध्यक्ष तामाङले कुल मागको ६० प्रतिशत काठमाडौं उपत्यकामा र बाँकी ४० प्रतिशत गुलाफ देशका अन्य सहरमा खपत हुने जानकारी दिए ।

फागुन १, २०८० मंगलबार १५:२७:४४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।