पाकिस्तान निर्वाचन : २३३ मध्ये ४७ सिटको नतिजा घोषणा, इमरान खान समर्थित १६ स्वतन्त्र उम्मेदवार विजयी

एजेन्सी : पाकिस्तानको निर्वाचन आयोगले नेशनल एसेम्बली र प्रान्तीय निर्वाचनको कुल २३३ मध्ये ४७ सिटको नतिजा घोषणा गरेको छ।

बिहीबार मतदान भएको १८ घण्टापछि यी निर्वाचनको नतिजा सार्वजनिक गरिएको हो।

निर्वाचन आयोगका अनुसार नेशनल एसेम्बलीका ४७ मध्ये इमरान खानको पार्टी तहरीक-ए-इन्साफ वा पीटीआईले समर्थन गरेका १६ स्वतन्त्र उम्मेदवार विजयी भएका छन्।

पाकिस्तान मुस्लिम लिग-नवाजले १७ सिट र पाकिस्तान पिपुल्स पार्टीले १२ सिट जितेको छ।

हालसम्मको नतिजाका आधारमा सिन्धको ५३ सिटमा विजयी घोषित भएको छ। पीपीपीले ४५ सिट जितेको छ भने चार सिटमा स्वतन्त्र उम्मेदवार विजयी भएका छन्। जीडीएले दुई सिट र जमियत-ए-इस्लामले एक सिट पाएको छ।

खैबर पख्तुनख्वा प्रान्तका ५० सिटमा नतिजा घोषणा भइसकेको छ भने ४५ सिटमा पीटीआईले समर्थन गरेका उम्मेदवार विजयी भएका छन्।

पञ्जाब प्रान्तीय निर्वाचनमा ७७ सिटको नतिजा सार्वजनिक भएको छ र तीमध्ये पीएमएलएनले ३९ सिटमा जित हासिल गरेको छ भने पीटीआई समर्थित स्वतन्त्र उम्मेदवारले ३३ सिटमा जित हासिल गरेका छन्।

बलुचिस्तानको ६ सिटको नतिजा आएको छ। एक सिटमा पीएमएलएन र एक सिट बिएनपी अवामीले जितेका छन्। यहाँ जुलुसले तीन र पीपीपीले एक सिट जितेको छ।

माघ २६, २०८० शुक्रबार १३:५२:०८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।