बैंक तथा वित्तीय संस्थामा बचतको अनुपातमा ऋण प्रवाह बढेन, निक्षेप ६.६ प्रतिशतले बढ्दा ऋण ४ प्रतिशतले बढ्यो
काठमाडौँ : चालु आर्थिक वर्षको ६ महिनाको संस्थाहरूको निक्षेप संकलन बढेको छ। तर निक्षेप बढे अनुसार कर्जा प्रवाह भने बढ्न सकेको देखिँदैन।
नेपाल राष्ट्र बैंकले मंगलबार सार्वजनिक गरेको ६ महिनाको वित्तीय अवस्थाको प्रतिवेदन अनुसार यो बिचमा बैंक तथा वित्तीय संस्थाहरूको निक्षेप संकलन ६.६ प्रतिशतले बढेको छ। तर निजी क्षेत्रमा प्रवाहित कर्जा भने ४ प्रतिशतले मात्र बढेको छ।
प्रतिवेदनमा उल्लेख भए अनुसार वार्षिक विन्दुगत आधारमा निक्षेपको वृद्धिदर १४.९ प्रतिशत रहेको छ भने निजी क्षेत्रमा प्रवाहित कर्जाको वृद्धिदर भने ४. ९ प्रतिशत मात्र छ।
६ महिनाको अवधिमा बैंक तथा वित्तीय संस्थाहरूमा ३ खर्ब ७७ अर्ब ७ करोड बढेको छ। अघिल्लो वर्षको तुलनामा यो २ खर्ब १४ अर्ब १४ करोड बढी हो।
पुस मसान्तसम्मको तथ्याङ्क अनुसार बैंक तथा वित्तीय संस्थाहरूको कुल निक्षेपमध्ये चल्ती, बचत र मुद्दती निक्षेप ६.८, २६.८ र ५९.९ प्रतिशत रहेको देखिन्छ। गत वर्ष यो ७.८, २५.६ र ६०. ३ प्रतिशत रहेको थियो।
पुस मसान्तसम्म बैंक तथा वित्तीय संस्थाहरूको कुल निक्षेपमा संस्थागत निक्षेपको अंश ३६. ६ प्रतिशत रहेको छ। गत वर्षको यही अवधिमा यसको अङ्क ३६.६ प्रतिशत थियो।
६ महिनाको अवधिमा बैंक तथा वित्तीय संस्थाहरूबाट निजी क्षेत्रमा १ खर्ब ९२ अर्ब ६४ करोड प्रवाह गरेको देखिन्छ। यो ४ प्रतिशत वृद्धि रहेको राष्ट्र बैंकले सार्वजनिक गरेको प्रतिवेदनमा उल्लेख छ। अघिल्लो वर्ष यो अवधिमा एक खर्ब ३७ अर्ब ३३ करोड मात्र ऋण प्रवाह भएको थियो।
वार्षिक विन्दुगत आधारमा पुस मसान्तसम्म बैंक तथा वित्तीय संस्थाहरुबाट निजी क्षेत्रतर्फ प्रवाहित कर्जा ४. ९ प्रतिशतले बढेको उल्लेख छ।
गत वर्षको यही अवधिका आधारमा गैर वित्तीय संस्थागत क्षेत्रतर्फ घटेको र व्यक्तिगत तथा घरपरिवार क्षेत्रतर्फ प्रवाह भएको ऋणको अंश बढेको देखिन्छ।
२०८० पुस मसान्तसम्म गैर वित्तीय संस्थागत क्षेत्रतर्फ प्रवाह भएको कर्जाको ६३.२ प्रतिशत प्रवाह भएको देखिन्छ। गत वर्ष यही अवधिमा ६४.९ प्रतिशत प्रवाह भएको थियो।
व्यक्तिगत तथा घर परिवार क्षेत्रमा यो वर्षको ६ महिनामा प्रवाह भएको कर्जामध्ये ३८.८ प्रतिशत देखिन्छ। गत वर्षको यही अवधिमा यसको अंश ३५.१ रहेको छ।
आर्थिक वर्ष २०८०-८१ को ६ महिनामा बैंक तथा वित्तीय संस्थाहरूको लगानीमा रहेको कर्जामध्ये यातायात, सञ्चार तथा सार्वजनिक सेवा क्षेत्रतर्फको सबैभन्दा धेरै बढेको देखिन्छ। यो क्षेत्रमा प्रवाह भएको कर्जा १०.६ प्रतिशतले बढेको छ। दोस्रोमा औद्योगिक उत्पादन क्षेत्रतर्फको कर्जा ८.० प्रतिशतले बढेको देखिन्छ।
अन्यमा कृषि क्षेत्रतर्फ प्रवाह भएको कर्जा १.१ प्रतिशतले, , निर्माण क्षेत्रतर्फको कर्जा ४.१ प्रतिशतले, थोक तथा खुद्रा व्यापार क्षेत्रतर्फको कर्जा २.० प्रतिशतले, सेवा उद्योग क्षेत्रतर्फको कर्जा ४.५ प्रतिशतले र उपभोग्य क्षेत्रतर्फको कर्जा ७.० प्रतिशतले बढेको छ।
यस अवधिमा निजी क्षेत्रतर्फ प्रवाहित कर्जामध्ये सबैभन्दा धेरै वाणिज्य बैंक र सबैभन्दा कम वित्त कम्पनीको बढेको छ।
वाणिज्य बैङ्कहरूको कर्जा प्रवाह ४.० प्रतिशतले बढेको छ भने विकास बैङ्कहरूको ४.४ प्रतिशतले र वित्त कम्पनीहरूको कर्जा प्रवाह २.४ प्रतिशतले बढेको छ ।
पुस मसान्तसम्म बैंक तथा वित्तीय संस्थाहरूबाट प्रवाहित कर्जामध्ये आवधिक कर्जा १३.२ प्रतिशतले, नगद प्रवाह कर्जा २७.५ प्रतिशतले, ट्रस्ट रिसिट (आयात) कर्जा ५.८ प्रतिशतले, रियल स्टेट कर्जा (व्यक्तिगत आवासीय घर कर्जासमेत) ४.७ प्रतिशतले र मार्जिन प्रकृतिको कर्जा १०.५ प्रतिशतले बढेको छ भने अधिविकर्ष कर्जा ४१.० प्रतिशतले (पछिल्लो वर्षको कर्जाको पुन वर्गीकरणको कारणसमेत) र हायर पर्चेज कर्जा १९.९ प्रतिशतले घटेको देखिन्छ।
राष्ट्र बैंकको प्रतिवेदन अनुसार २०८० पुस मसान्तमा १ लाख ३३ हजार १ सय ७४ ऋणीलाई प्रवाह भएको १ खर्ब ५५ अर्ब ४० करोड सहुलियतपूर्ण कर्जा बक्यौता छ।
यसमध्ये कृषि तथा पशुपक्षी व्यवसाय कर्जाअन्तर्गत ५२ हजार ८ सय ७२ ऋणीलाई प्रवाह भएको १ खर्ब ४ अर्ब ७३ करोड कर्जा बक्यौता रहेको छ भने महिला उद्यमशील कर्जा अन्तर्गत ७७ हजार ९ सय १८ महिला उद्यमीलाई प्रवाह भएको ४८ अर्ब ६० करोड कर्जा बक्यौता रहेको छ। सहुलियतपूर्ण कर्जाका अन्य शीर्षक अन्तर्गत २ हजार ३ सय ८४ ऋणीको २ अर्ब ७ करोड कर्जा बक्यौता रहेको उल्लेख छ।
व्यावसायिक निरन्तरता कर्जा प्रवाह कार्यविधि, २०७७ बमोजिम कोभिड–१९ प्रभावित पर्यटन र घरेलु, साना तथा मझौला उद्यम क्षेत्रको व्यवसाय निरन्तरतामा सहयोग पुर्याउन ती क्षेत्रका श्रमिक तथा कर्मचारीको पारिश्रमिक भुक्तानीका लागि प्रवाह भएको कर्जा २०८० पुस मसान्तसम्ममा भुक्तानी भइसकेको प्रतिवेदनमा उल्लेख छ।
माघ २३, २०८० मंगलबार १३:१०:४६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
