इन्डियन आइडलबाट बाहिरिएपछि झापा आएकी मेनुकाले भनिन्- 'नसोचेको सफलता पाएँ'
काठमाडौं : आइतबार इण्डियन आइडल सिजन १४ को अन्तिम १० बाट मेनुका बाहिरिएकी गायिका मेनुका पौडेललाई गृह जिल्लामा भव्य स्वागत गरिएको छ।
मेनुकालाई नेपालको पूर्व मेचीपुल हुँदै झापा आइपुगेपछि उनलाई कलाकार, सर्वसाधारणदेखि विभिन्न संघसंस्थाले भव्य स्वागत गरेका छन्।
उनलाई स्वागतका लागि हास्यअभिनेता विलसन बिक्रम राईसहितको भीडले झाँकी र र्यालीसहित गाडीमा चढाएर काँकडभिट्टा नगर परिक्रमा गराएका छन्। मेनुकालाई धुलाबारी, चारआली हुँदै बिर्तामोड र अर्जुनधारामा परिक्रमा गर्दै गृहनगर चारआलीमा स्वागत तथा सम्मान गरिएको हो।
उक्त समारोहमा पुगेका आफ्ना समर्थकलाई गायिका पौडेलले धन्यवाद दिएकी छन्। सोही क्रममा हास्यअभिनेता राईले मेनुकालाई सम्मान प्रदान गरेका छन्।
मेनुकाले उपस्थित सबैलाई धन्यवाद दिँदै आफूले नसोचेको सफलता हासिल गरेको बताइन्।
उनले भनिन्, ‘मलाई एकदमै खुसी लागिरहेको छ। मैले नसोचेको सफलता हो यो। इण्डियन आइडलमा गीत गाउँछु भनेर मात्र भगवानसँग प्रार्थना गरेकी थिएँ। यहाँ सम्म आइपुग्नु यो त सोचेको भन्दा पनि ठूलो सफलता हो। जुन हामीले विरलै मात्र प्राप्त गर्न सक्छौं।’
मेनुकाले इण्डियन आइडलको सिजन १४ को अन्तिम १० सम्म आइपुग्दा बलिउड फिल्म ‘सलार’को गीत गाएकी थिइन्।
माघ २२, २०८० सोमबार १७:५६:३१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
