दीपेन्द्रको ‘दुःखी आत्मा’मा दया र आँचल
काठमाडौं : दीपेन्द्र लामाको लेखन तथा निर्देशनमा बन्न लागेको फिल्म ‘दुःखी आत्मा’मा अभिनेत्री आँचल शर्माले अभिनय गर्ने पक्कापक्की भएको छ।
सोमबार निर्माण टिम र शर्माबीच कागजी सम्झौता भएको हो।
क्लक वर्क क्रिएसनको ब्यानरमा बन्न लागेको यो फिल्ममा यसअघि दयाहाङ राई अनुबन्धित भइसकेका छन्। निर्देशक लामाले दयाको जोडीका रुपमा आँचल अनुबन्धित गरेका हुन्।
फिल्म ‘नाङ्गो गाउँ’का निर्माता हिमाल कडरियाले लगानी गर्ने यस फिल्ममा अन्य कलाकारको भने छनोट गरिएको छैन। काठमाडौं आसपासमा खिचिने यो फिल्म सामाजिक कमेडी जनराको बन्ने निर्माण पक्षले जानकारी दिएको छ।
यही टिमले तेस्रो सहकार्य स्वरूप केही साता अघि ‘नाङ्गो गाउँ–२’ निर्माण गर्ने घोषणा गरिसकेको छ।
यही वर्षको अन्तिम महिनाबाट फ्लोरमा जाने यस फिल्मको हाल स्क्रिप्ट लेखन कार्य भइरहेको छ। निर्देशक लामाले यसअघि फिल्म ‘गोपी’, ‘छ माया छपक्कै’, ‘नाङ्गो गाउँ’ लगायत फिल्म निर्देशन गरिसकेका छन्।
उनको यो फिल्मलाई वितरण आरआर फिल्मस्ले गर्नेछ।
माघ १५, २०८० सोमबार १७:२५:२८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
