बैंकिङ्ग प्रणालीमा शंकास्पद कारोबारको संख्या उकालो लाग्दै, गत आवमा मात्रै ६ हजार बढीको कारोबार

काठमाडौँ : गत आर्थिक वर्ष २०७९/०८० मा शंकास्पद वित्तीय कारोबार रिपोर्टिङ सतप्रतिशतले बढेको छ।

गत आर्थिक वर्षको तथ्यांक सार्वजनिक गर्दै यस्तो शंकास्पद कारोबार ६ हजार भन्दा बढी भएको रिपोर्टिङ गरिएको हो।

शंकास्पद वित्तीय कारोबार निगरानी गर्न नेपाल राष्ट्र बैँकमा रहेको वित्तीय जानकारी इकाइले आर्थिक वर्ष २०७९/०८० को वार्षिक प्रतिवेदन सार्वजनिक गर्दै शंकास्पद कारोबार तथा शंकास्पद गतिविधिमा उल्लेख्य वृद्धि भएको जनाएको हो।

२०७८/०७९ मा २ हजार ७ सय ८० कारोबार रिपोर्टिङ वित्तीय जानकारी इकाइमा भएको थियो। गत आर्थिक वर्षमा यो बढेर ५ हजार ९ सय ३५ पुगेको हो।

त्यस्तै, आव २०७७/०७८ मा १ हजार ५ सय ३३ शंकास्पद कारोबार वित्तीय जानकारी इकाइमा रिपोर्टिङ भएका थियो।

नेपाल राष्ट्र बैंकले वाणिज्य बैँकहरूमा १ माघ २०७६ देखि अनलाइनमार्फत नै बैंक शंकास्पद कारोबार र गतिविधि रिपोर्ट वित्तीय जानकारी इकाइमा गर्न सक्ने प्रणाली कार्यान्वयनमा ल्याएको थियो। प्रतिवेदन अनुसार वाणिज्य बैँकहरूले ३५ अर्ब ५७ करोड ८७ लाख ५० हजार भन्दा बढी रकम सम्पत्ति शुद्धीकरण भएको आशंकामा वित्तीय जानकारी इकाईमा जानकारी गराएका छन्।

यस्तै, विकास बैंकले १६ करोड १७ लाख ७० हजार, फाइनान्स कम्पनीले २२ करोड ६४ लाख ७ हजार, जीवन बीमा कम्पनीले ४ करोड ३९ लाख २० हजार, भुक्तानी सेवा प्रदायकबाट १३ हजार, विप्रेषण कम्पनीबाट ८ करोड ८१ लाख १० हजार र स्टक ब्रोकर कम्पनीबाट २६ करोड २९ लाख रूपैयाँ बराबरको सम्पत्ति शुद्धीकरण भएको आशंकामा वित्तीय जानकारी इकाईमा जानकारी गराएको राष्ट्र बैंकले सार्वजनिक गरेको तथ्यांकमा उल्लेख छ।

माघ १०, २०८० बुधबार १६:२२:३९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।