‘दयारानी’को टिजरमा दयाहाङ र दीया श्रीमान-श्रीमती

काठमाडौं : अभिनेता दयाहाङ राई र अभिनेत्री दीया पुनको मुख्य भूमिकामा निर्माण भएको फिल्म ‘दयारानी’को टिजर सार्वजनिक भएको छ।

आज १ मिनेट ४६ सेकेन्ड लामो टिजर युटुबमार्फत रिलिज गरिएको हो।

टिजरमा श्रीमतीले सन्तान जन्माउन नसक्ने भएपछि श्रीमानलाई दोस्रो विवाहका लागि जोड दिएको देखिन्छ। निःसन्तान भएकाले दयालाई दोस्रो विवाह गर्न दीयाले प्रेरित गरेको टिजरमा देख्न सकिन्छ। तर, श्रीमती हुँदा हुँदै दोस्रो विवाह गर्न नसक्ने भन्दै दयाले दीयाको सो प्रस्ताव अस्वीकार गरेका छन्।

अर्को एक दृश्यमा भने दया सालीसँग ठट्टा गरिरहेको देखाइएको छ। फिल्मको टिजर हेर्दा हास्यप्रधान सँगै केही गम्भीरताका विषयलाई उठाउन खोजिएको बुझ्न सकिन्छ।

टिजरमा सालीको भूमिकामा प्रमिशा गुरुङले अभिनय गरेकी छन्।

यही माघ २६ गते रिलिज हुन लागेको फिल्म ‘दयारानी’लाई माओत्से गुरुङले निर्देशन गरेका छन्। बाँसुरी फिल्मस् र माओत्से फिल्मस्को ब्यानरमा निर्माण भएको फिल्ममा दयाहाङ र दीयाका अलावा विजय बराल, प्रमिशा गुरुङ, पुस्कर गुरुङ, टिकाराम घले लगायतका कलाकारको अभिनय गरेका छ।

शैलेन्द्र ध्वज कार्कीले खिचेको फिल्ममा मोहन गुरुङ, किरण गुरुङ, केन्द्र लिम्बु र न्यू आइटी भेन्चरको सहकार्यमा निर्माण भएको हो।

यो फिल्मका कार्यकारी निर्माता रामबाबु गुरुङ र अपिल विष्ट हुन् भने कास्टिङ डारेक्टर मणिराम पोखरेल हुन्।

माघ ४, २०८० बिहीबार १६:५५:०३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।