यम र विश्वको स्वरमा ‘साथी’ गीत सार्वजनिक
काठमाडौं : एक महिना अघि ‘टुङ्नाको धुन’ बोलको गीत स्रोतामाझ लिएर आएका गायक यम बरालले अर्को गीत पनि सार्वजनिक गरेका छन्।
उनले गायक विश्व नेपालीको सहकार्यमा ‘साथी’ गीतको भिडियो सार्वजनिक गरेका हुन्।
आज काठमाडौंको विश्वज्योती हलमा पत्रकार सम्मेलन गर्दै गीतको भिडियो रिलिज गरिएको हो।
उक्त गीतमा किरण के उप्रेतीको शब्द, पुष्कर सुनुवारको एरेन्ज र सङ्गीत, विप्लव अधिकारीको रेकर्ड र मिक्सिङ रहेको छ। यो गीतको भिडियोमा सन्जीत भण्डारी र मेग सुवेदीले अभिनय गरेका छन्।
स्वदेश या विदेश जो जहाँ भए पनि साथीको मित्रता असल हुन्छ भन्ने भाव गीतको भिडियोमार्फत प्रस्तुत गरिएको छ।
कुवेर तामाङको निर्देशन रहेको भिडियोलाई बुद्ध थापा एन्ड टिमले खिचेको हो। विवेक सुनारको सम्पादन, श्याम कुँवरको कलर रहेको गीतको भिडियोमा उत्सव पौडेलको स्किृप्ट, मोहन सुनुवार(नवीन)को सहायक निर्देशन, निर्मल न्यौपानेको प्रोडक्सन डिजाइन छ।
कार्यक्रममा उपस्थित भएका गायक यम बरालले अर्का गायक विश्व नेपाली उमेरले भाइ भए पनि सिनियर र जुनियर साथी हुन्छन् भन्ने सन्देश दिनका लागि नयाँ गीतमा काम गरेको बताए।
उनका अनुसार गीतको शब्दले पनि उनलाई गीतमा सहकार्य गर्न राजी बनाएको हो।
यता गायक विश्व नेपालीले पनि यम बरालको तारिफ गरेर थाकेनन्। उनले यम बरालको गीत सुनेर हुर्किएको भन्दै फुरुङ्ग पारिदिए।
‘आफूले यमलाई गुरु मान्दैको थिए। अहिले सहकार्य गर्न पाउँदा खुसी लागेको छ,’ विश्वले भने।
माघ ३, २०८० बुधबार १७:२५:३० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
