श्रीलंकाविरुद्धको दोस्रो टी२० मा जिम्बावेको जित, सिरिज १-१ को बराबरीमा

काठमाडौं : घरेलु टोली श्रीलंकाविरुद्धको दोस्रो टी२० आईमा जिम्बावे चार विकेटले विजयी भएको छ। योसँगै तीन खेलको टी२०आई सिरिज १-१ को बराबरी भएको छ।

कोलम्बोस्थित आर प्रेमादाशा स्टेडियममा टस हारेर पहिला ब्याटिङमा तानिएको घरेलु टोलीले निर्धारित ओभरमा ६ विकेट गुमाएर १७३ रन जोड्यो।

उसका लागि चरिथ असलंकाले ६९ र एङ्गेलो म्याथूजले अविजित ६६ रन बनाउनुबाहेक अन्य खेलाडीले सम्झनलायक प्रदर्शन गरेनन्।

जिम्बावेका लुक जोङवे र ब्लेसिङ मुजरबानीले समान दुई-दुई विकेट लिए।

जवाफी ब्याटिङमा उत्रिएको जिम्बावेले एक बल बाँकी छँदै ६ विकेट गुमाएर लक्ष्य भेट्टायो।

उसका लागि क्रायक इरभाइनले ७०, ब्रायन बेनेट र लुक जोङवेले अविजित २५-२५ रनको पारी खेले।

बलिङतर्फ श्रीलंकाका महीश थीशंका र दुष्मन्था चमीराले समान दुई-दुई विकेट लिए।

सिरिजको तेस्रो तथा अन्तिम खेल बिहीबार साँझ सवा ७ बजे हुँदैछ।

यसअघि भएको तीन खेलको एकदिवसीय सिरिज २-० ले घरेलु टोली श्रीलंकाले हात पारेको थियो। उक्त सिरिजको पहिलो खेल वर्षाका कारण अवरुद्ध भएको थियो।

माघ ३, २०८० बुधबार ०७:३९:१३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।