‘सीआईडी’का इन्स्पेक्टर फ्रेड्डीको निधन
काठमाडौं : चर्चित भारतीय टेलिभिजन शो ‘सीआईडी’मा इन्स्पेक्टर फ्रेड्डीको भूमिका निर्वाह गरेको अभिनेता दिनेश फडनीसको निधन भएको छ।
दिनेशको ५७ वर्षको उमेरमा सोमबार राति १२ बजेर ८ मिनेटमा निधन भएको सीआईडीमा दयाको भूमिका निभाएका दयानन्द शेट्टीले पुष्टी गरेको इण्डियन एक्प्रेसले जनाएको छ।
आइतबार उनलाई हृदयघात भएपछि मुम्बईको थुङ्गा अस्पताल लगिएको थियो। अभिनेता शेट्टीका अनुसार दिनेशको मल्टिपल अर्गन फेल भएर निधन भएको हो। उनको अन्तिम संस्कार विहान साढे १० बजे मुम्बईमा गरिएको छ।
दिनेशले सन् १९९८ मा पहिलो पटक प्रसारण भएको र सोनी टिभीमा बीस वर्षसम्म चलेको टेलिभिजन कार्यक्रम ‘सीआईडी’मा इन्स्पेक्टरको भुमिकामा अभिनय गरेका थिए।
त्यसपछि ‘तारक मेहताका उल्टा चश्मा’ लगायत केहि टेलिफिल्म तथा फिल्ममा समेत उनले काम गरेका थिए।
मंसिर १९, २०८० मंगलबार १२:४८:३६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
