भारत र अष्ट्रेलिया टी-२० सिरिज : एक खेल अगावै उपाधि जित्ने घरेलु टोलीको दाउ

काठमाडौं : भारत र अष्ट्रेलियाबीचको पाँच खेलको टी-२० आई सिरिजमा आज चौथो खेल हुँदैछ।

खेल रायपुरको शहीद वीर नारायण सिंह अन्तर्राष्ट्रिय क्रिकेट स्टेडियममा नेपाली समयअनुसार साँझ सवा सात बजे हुनेछ।

भारत सूर्यकुमार यादव र अष्ट्रेलिया म्याथू वेडको कप्तानीमा सिरिज खेलिरहेका छन्।

तीन खेल भइसक्दा भारतमा २-१ को सहज अवस्थामा छ। आजको खेल जिते एक खेल अगावै उसले सिरिज उपाधि हात पार्न सक्छ।

तर, अष्ट्रेलिया भारतलाई रोक्न चाहन्छ। दुई खेलमा लगातारको हारपछि तेस्रो खेलमा ग्लेन म्याक्सवेलको शतकमा अष्ट्रेलियाले उत्कृष्ट पुनरागमन गरेको थियो।

तेस्रो खेलमा म्याक्सवेलले ५७ बलमा १३ चौका र ७ छक्काको मद्दतमा अविजित रहँदै १२३ रन जोडेका थिए।

भारतले पहिलो खेलमा दुई विकेट र दोस्रो खेलमा ४४ रनले विजयी हुँदा तेस्रो खेल अष्ट्रेलियाले पाँच विकेटले आफ्नो पक्षमा पारेको थियो।

सिरिजको पाँचौं तथा अन्तिम खेल आइतबार बैंग्लुरुको एम चिन्नस्वामी स्टेडियममा हुनेछ।

मंसिर १५, २०८० शुक्रबार ०७:३५:३१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।