रायोका डिफेन्डरले आत्मघाती गोल गरेपछि बार्सिलोनाको बराबरी

एजेन्सी : स्पेनिश लालिगा अन्तर्गत शनिबार साँझ भएको खेलमा बार्सिलोना बराबरीमा रोकिएको छ।

बार्सिलोना रायो भालेकानो विरुद्ध १-१ को बराबरीमा रोकिएको हो।

फ्लोरियन लेजुएनले आत्मघाती गोल गर्दा बराबरीमा रोकिएको रायोका लागि उनाइ लोपेजले सुरुवाती अग्रता दिलाएका थिए।

३९औं मिनेटमा लोपेजले बक्स बाहिरबाट गरेको सुन्दर प्रहार गोलमा परिणत भएको थियो।

दोस्रो हाफमा भने बार्सिलोनाले केहि सुधारिएको प्रदर्शन गर्यो। थुप्रै अवसरहरू पनि सिर्जना गर्यो र ८२औं मिनेटमा बार्सिलोनाले बराबरी गर्यो।

अलेकज्याण्डर बाल्डेको क्रसमा रायोका डिफेन्डर लेजुएनले आत्मघाती गोल गरेका थिए। बराबरी पछि बार्सिलोनाको १४ खेलमा ३१ अंक रहेको छ।

एक खेल कम खेलेका जिरोना र रियल म्याड्रिडको क्रमश: ३४ र ३२ अंक रहेको छ।

चौथो स्थानमा रहेको एटकेटीको म्याड्रिडको दुई खेल कम खेल्दा २८ अंक रहेको छ।

मंसिर १०, २०८० आइतबार ०८:२१:५७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।