सर्लाहीमा गुलशनलाई अभिनन्दन

सर्लाही : राष्ट्रिय टोलीका क्रिकेट खेलाडी गुलशन झालाई मलङ्गवामा अभिनन्दन गरिएको छ।

नेपालले टी-२० विश्वकपको एसिया छनोटमा उत्कृष्ट प्रदर्शन गरेको भन्दै नेपाल पत्रकार महासङ्घ सर्लाही शाखाले सोमबार उनलाई सम्मान गरेको हो।

सर्लाहीको चक्रघट्टा गाउँपालिका-७, सगरदिना स्थायी घर भएका झा हाल सदरमुकाम मलङ्गवा-८ मा बस्दै आएका छन्।

क्रिकेट खेलको माध्यमबाट झाले सर्लाहीसहित देशको मान अन्तर्राष्ट्रिय क्षेत्रमा विस्तार गरेकाले सम्मान गरिएको नेपाल पत्रकार महासङ्घ सर्लाही शाखाका अध्यक्ष टङ्क क्षेत्रीले जानकारी दिए।

राष्ट्रिय क्रिकेट टोलीका अलराउन्डर झाको हौसला बढाउनका लागि अभिनन्दन गरिएको उनले बताए।

जिल्ला समन्वय समिति सर्लाहीका प्रमुख कौशलकिशोर सिंह, चन्द्रनगर गाउँपालिकाका अध्यक्ष राजकुमार महतो, प्रमुख जिल्ला अधिकारी कोमलप्रसाद धमला, नेपाल पत्रकार महासङ्घका अध्यक्ष क्षेत्रीले संयुक्त रूपमा क्रिकेट खेलाडी झालाई दोसल्ला ओढाएर कदरपत्र प्रदान गरेका थिए।

कात्तिक २८, २०८० मंगलबार ०८:५८:१६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।