जाजरकोट भूकम्प पीडितका लागि बुटवल उपमहानगरले पठायो एक ट्रक खाद्यान्न र लत्ताकपडासहितको राहत सामग्री

बुटवल : बुटवल उपमहानगरपालिकाले जाजरकोटको भूकम्प प्रभावित क्षेत्रका बासिन्दाका लागि खाद्यान्नसहितको राहत सामग्री पठाएको छ।

भूकम्प पीडितका लागि आइतबार राती नै चामल, दाल, तोरीको तेल, नुन, सोयाबिन, ब्लाङकेट र म्याट गरी एक ट्रक सामान जाजरकोट पठाएको बुटवल उपमहानगरपालिकाका प्रमुख खेलराज पाण्डेयले बताए।

आइतबार बुटवल उपमहानगरपालिकामा बसेको विपद् व्यवस्थापन समितिको बैठकको निर्णयअनुसार बुटवल उप-महानगरपालिकाले एकद्वार प्रणालीमार्फत राहत सामग्री हस्तान्तरण गर्ने निर्णय गरेको थियो। 

सोही निर्णय अनुसार नगर प्रमुख पाण्डेयले रुपन्देहीका प्रमुख जिल्ला अधिकारी गणेश अर्यालमार्फत जाजरकोट पुग्ने गरी राहत सामग्री हस्तान्तरण गरेका हुन।

राहत सामग्री हस्तान्तरण गर्दै प्रमुख पाण्डेयले बुटवल उपमहानगरपालिकाले २५ लाख रुपैयाँ, जनप्रतिनिधिले थप ५ लाख रुपैयाँ र कर्मचारीको तर्फबाट समेत सहयोग गर्ने निर्णय भएको बताए। 

उनले बुटवलले बुटवलभित्रका संस्थाहरूलाई एकद्वार प्रणालीमार्फत राहत सामग्री पठाउने व्यवस्था भएकाले सोहीअनुसार गर्नका लागि आह्वान गरे। 

अव्यवस्थित रुपमा राहत सामग्री पठाउँदा वास्तविक प्रभावितसम्म पुग्न नसकेको र अन्योल सिर्जना भएको खबरअनुसार एकीकृत रुपमा राहत सामग्री संकलन गरी पठाउने व्यवस्था मिलाइएको प्रमुख पाण्डेयले बताए।

राहत सामग्री लिएर बुटवल उपमहानगरपालिकाका २ जना कर्मचारी र २ जना पत्रकार जाजरकोट प्रस्थान गरेको प्रमुख प्रशासकीय अधिकृत विष्णु प्रसाद भुसालले बताए। 

उनले अहिले बुटवल उपमहानगरपालिकाकै श्रोतबाट एकट्रक राहत सामग्री पठाइएको र बुटवलका संघसंस्थाहरुको राहत सामग्री संकलन भएपछि पुनः सामग्री पठाउने बताए।

बुटवल उपमहानगरपालिकाले बुटवलका संघसंस्था र अन्य सहयोगीहरुलाई एकद्वार प्रणालीबाट राहत सामग्री पठाउन अपील गरेको छ। जसका लागि उपमहानगरपालिकाले विपद शाखा प्रमुख योगेश चापागाइँलाई फोकल पर्सन तोकेको छ।

बुटवल उपमहानगरपालिकाको आव्हानमा आइतबार बसेको विपद् व्यवस्थापन समितिको बैठकमा बुटवल उद्योग वाणिज्य संघ बुटवल र रुपन्देही व्यापार संघले एक लाख एक हजार एक सय ११ रुपैयाँ नगद सहयोग गर्ने घोषणा गरेका छन्।

यस्तै नेपाल एसोसिएसन अफ टूर एण्ड ट्राभल एजेण्ट्स (नाट्टा) लुम्बिनीले ५० हजार नगद र अन्य सहयोग गर्ने तथा पश्चिमाञ्चल ट्रक व्यवसायी प्रालि बुटवलले ४ वटा ट्रकको भाडा बराबर ४ लाख रुपैयाँ सहयोग गर्ने प्रतिबद्धता जनाएको छ। 

यस्तै मासु व्यवसायी संघ, रेडक्रस सोसाइटीलगायतका संस्थाहरूले पनि सहयोग गर्ने प्रतिबद्धता जनाएका छन्।

कात्तिक २०, २०८० सोमबार ०९:१२:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।