न्यूजिल्याण्डको अपराजित यात्रामा भारतको ब्रेक : कोहलीको ९५ रन, सामीले लिए पाँच विकेट
![न्यूजिल्याण्डको अपराजित यात्रामा भारतको ब्रेक : कोहलीको ९५ रन, सामीले लिए पाँच विकेट](https://ukeraa.prixacdn.net/media/albums/kolhi_gYSCeWaHGF.png )
काठमाडौं : विश्वकप २०२३ मा विराट कोहलीको ९५ रनको शानदार इनिङका साथ भारतले न्यूजिल्याण्डलाई चार विकेटले हराएको छ।
यो जितसँगै भारत अंक तालिकाको शीर्ष स्थानमा उक्लिएको छ। अहिले भारतको पाँच खेलमा १० अंक छ भने न्युजिल्यान्डको समान संख्यामा चार खेल जितेर दोस्रो स्थानमा छ।
जारी विश्वकपमा न्यूजिल्याण्डको यो पहिलो हार हो। यसअघि भएका विश्वकपमा चार खेलमा उसले इंग्ल्याण्ड, नेदरल्याण्ड्स, बंगलादेश र अफगानिस्तानलाई पराजित गरेको थियो। भारतले उसको अपराजित यात्रामा ब्रेक लगाएको हो।
पहिले ब्याटिङ गरेको न्युजिल्यान्डले भारतलाई २७४ रनको लक्ष्य दिएको थियो, जुन भारतले १२ बल बाँकीमै पूरा गरेको थियो।
भारतका लागि विराट कोहलीका अलावा रोहित शर्माले ४६ रन र श्रेयस अय्यरले ३३ रनको योगदान दिए। रविन्द्र जडेजा ३९ रन बनाएर नटआउट रहे।
भारतीय ब्याटिङका क्रममा अम्पायरले १६औं ओभरमा कुहिरोका कारण प्रकाश कम भएकाले खेल रोक्नुपरेको थियो। तर, केही समयपछि पुनः खेल सुचारू भयो।
खेल सुचारू भएपछि श्रेयस अय्यर र विराट कोहलीबीच तेस्रो विकेटका लागि अर्धशतकीय साझेदारी गरे। तर, खेलको २२औं ओभरमा यो साझेदारी टुट्यो।
श्रेयस अय्यरले ट्रेन्ट बोल्टको बललाई डीप स्क्वायर लेगमा खेले, डेभोन कोनवेले त्यसलाई क्याच गर्न कुनै गल्ती गरेनन्। अय्यरले २९ बलमा ३३ रनको इनिङ खेले।
अय्यरपछि सूर्यकुमार यादव पिचमा आए तर उनी २ रन बनाएर रनआउट भए।
न्यूजिल्याण्डले दिएको २७४ रनको लक्ष्य पछ्याउँदै भारतलाई ओपनर कप्तान रोहित शर्मा र शुभमन गिलले तीव्र सुरुवात गराए।
दुवैले ९औं ओभरमा भारतको स्कोरलाई ५० रनभन्दा माथि पुर्याएका थिए। भारतले ११ ओभरमा बिना विकेट गुमाएर ७१ रन बनाएको थियो।
तर, १२औं ओभरको पहिलो बलमा रोहित शर्मा आउट भए। उनले ४० बलमा चार चौका र धेरै छक्काको मद्दतमा ४६ रन बनाए।
अर्कोतर्फ शुभमन गिल एकदिवसीय क्रिकेटमा आफ्नो इनिङ्समा सबैभन्दा छिटो दुई हजार रन बनाउने ब्याट्सम्यान बने।
गिलले मात्र ३८ इनिङ्समा दुई हजारको आँकडा पार गरे। उनले हाशिम अल्माको कीर्तिमान (४० इनिङ्स) पछाडि पारे।
शुभमन गिल पनि १४औं ओभरको दोस्रो बलमा आउट भए। उनलाई लोकी फर्ग्युसनले आउट गरेका थिए।
टस जितेर भारतका कप्तान रोहित शर्माले न्यूजिल्याण्डलाई पहिले ब्याटिङको निम्तो दिएका थिए। न्यूजिल्याण्डको इनिङ्सको सुरुवात डेभोन कोनवे र विल योङले गरेका थिए।
जसप्रित बुमराह र मोहम्मद सिराजले बलिङको जिम्मा लिएका थिए। दुवैले सुरुदेखि नै विकेट टु विकेट बलिङ गरेपछि न्युजिल्याण्डका ब्याट्सम्यानलाई रन बनाउन गाह्रो भएको थियो।
खेलको चौथो ओभरमा मोहम्मद सिराजको बलमा डेभन कोनवे खाता नखोल्दै आउट भए। न्यूजिल्याण्डको पहिलो विकेट मात्र ९ रनमा खसेको थियो।
त्यसपछि पनि बुमराह र सिराजले उत्कृष्ट बलिङ जारी राखे र न्युजिल्यान्डले पहिलो ६ ओभरमा १३ रन मात्र बनाएको थियो।
आठौँ ओभरमा मोहम्मद शामीले योङलाई आउट गरे। योङले २७ बलमा १७ रनको इनिङ खेले। १० ओभरसम्म न्युजिल्यान्डको स्कोर दुई विकेटमा ३४ रन मात्र थियो।
११औं ओभरमा रचिन रविन्द्रले ब्याकवर्ड पोइन्टमा शमीको गुड लेन्थ बल खेले, बल सिधै त्यहाँ उभिएका भारतका उत्कृष्ट फिल्डर रविन्द्र जडेजाको हातमा गए तर उनले समात्न सकेनन्।
क्याच मिस भएपछि उनले त्यसको भरपूर फाइदा उठाए। यसपछि ड्यारेल मिचेल र रविन्द्रको जोडीले बिस्तारै हात खोल्न थाले। दुवैले शतकीय साझेदारी गरे।
खेलको २३ औं ओभरमा रचिन रविन्द्रले आफ्नो अर्धशतक पूरा गरे। दुईबीचको शतकीय साझेदारी २५औं ओभरमा पूरा भयो।
ड्यारेल मिचेलले २७ औं ओभरमा आफ्नो अर्धशतक पूरा गरे। अन्ततः ३४ औं ओभरमा मोहम्मद शामीले रचिन रविन्द्रलाई शुभमन गिलको हातमा क्याच आउट गराएर यो जोडी तोडेका थिए।
दुवैले तेस्रो विकेटका लागि १५९ रनको साझेदारी गरे।
३७औं ओभरमा कुलदीपले नयाँ ब्याट्सम्यान टम लाथम एलबीडब्ल्यू आउट भए। कुलदीपले एकदिवसीयमा तेस्रो पटक लाथमको विकेट लिए। ड्यारेन मिचेलले यो विश्वकपमा आफ्नो पहिलो शतक ४१ औं ओभरमा बनाएका थिए।
४५ औं ओभरमा कुलदीपले ग्लेन फिलिपलाई पनि आउट गरे। बुमराहले ४७ औं ओभरमा मार्क च्यापम्यानलाई आउट गरेका थिए।
४८ औं ओभरमा मोहम्मद शामीले मिचेल सान्टनरलाई बोल्ड गरेर प्याभिलियन फर्काए, अर्को बलमा उनले म्याट हेनरीलाई पनि बोल्ड गरे। योसँगै न्युजिल्यान्डले निर्धारित ५० ओभरमा २७३ रन बनाएको थियो।
मोहम्मद शामीले यो विश्वकपमा पहिलो पटक खेल्ने मौका पाएका थिए र उनी यस खेलमा भारतका लागि सबैभन्दा सफल बलर साबित भए। उनले पाँच विकेट लिए।
ठीक एक महिनाअघि (२२ सेप्टेम्बर २०२३मा) उनले अस्ट्रेलियाविरुद्ध पनि पाँच विकेट लिएका थिए। एकदिवसीय क्रिकेटमा मोहम्मद शामीले पाँच विकेट लिएको यो तेस्रो पटक हो।
आफ्नो ९५औं एकदिवसीय खेल खेलिरहेका मोहम्मद शामीले १७६ विकेट लिएका छन्। यस इनिङ्समा शमीले एकदिवसीयमा इरफान पठानको १७३ विकेटको कीर्तिमानलाई पछाडि छोडे।
अब शमी एकदिवसीय क्रिकेटमा सबैभन्दा बढी विकेट लिने भारतका ९औं बलर बनेका छन्। सामीका अलावा कुलदीप यादवले २ विकेट लिए। बुमराह र सिराजले एक–एक विकेट लिए।
कात्तिक ६, २०८० सोमबार ०८:२३:४५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।