नेपाली क्रिकेट टिम नागपुर जाँदै, राजस्थान रोयल्सको एकेडेमीमा प्रशिक्षण गर्ने
काठमाडौं : नेपाली राष्ट्रिय क्रिकेट टिमले इन्डियन प्रिमियल लिग (आईपीएल)को टिम राजस्थान रोयल्सको एकेडेमीमा प्रशिक्षण गर्ने भएको छ।
नेपाली क्रिकेट टिमले आसन्न टी-२० विश्वकपको तयारीका लागि भारतको नागपुरमा १० दिन ‘हाई पफर्मेन्स’ प्रशिक्षण गर्ने भएको हो।
त्यसका निम्ति नेपाली टिम आजै भारत गएको नेपाल क्रिकेट संघ (क्यान) ले जनाएको छ। टी-२० विश्वकपको एसिया क्षेत्रीय छनोट यही अक्टोबर ३० देखि नेपालमा नै हुने तालिका छ।
प्रतियोगितामा कुल आठ टिमले प्रतिस्पर्धा गर्नेछन्। शीर्ष दुई टिम सन् २०२४ मा वेस्ट इन्डिज र अमेरिकामा हुने टी-२० विश्वकपमा छनोट हुनेछन्।
नेपाली टिम चीनमा जारी एसियाडमा सहभागी भएर बिहीबार मात्र स्वदेश फर्किएको थियो। नेपालले एसियाडको पुरुष क्रिकेटमा क्वार्टरफाइनलसम्मको यात्रा तय गरेको थियो।
अन्तिम–८ को खेलमा भारतसँग पराजित भएपछि नेपालको यात्रा समाप्त भएको थियो।
असोज १९, २०८० शुक्रबार ०९:३६:२६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
