नेपालगञ्जमा प्रशासनले फेरि जारी गर्यो निषेधाज्ञा, कर्फ्यूको क्रम पनि जारी
काठमाडौं : बाँकेको नेपालगञ्जमा निषेधाज्ञा र कर्फ्यूको क्रम जारी छ।
जिल्ला प्रशासन कार्यालय बाँकेले शुक्रबार बिहान सूचना जारी गरी पुनः निषेधाज्ञा र कर्फ्यू लगाएको हो।
नेपालगञ्ज उपमहानगरपालिका क्षेत्रभित्र शुक्रबार बिहान ६ बजेदेखि राति ८ बजेसम्म निषेधाज्ञा जारी गरेको प्रमुख जिल्ला अधिकारी विपीन आचार्यले जानकारी दिए।
पूर्वमा राप्ती नदी पुल, पश्चिममा खजुरा रोडको इन्द्रपुर जाने बाटो, उत्तरमा राँझा चोक र दक्षिणमा जमुनाहा सीमा नाकाका चार किल्लाभित्र कुनै प्रकारको भेला, जुलुस, सभा, बैठक वा प्रदर्शन गर्न वा पोस्टर, पर्चाजस्ता प्रचार सामग्री टास्न वा लेख्न तथा हुलदंगा वा अशान्ति गर्ने उद्देश्यले एकै स्थानमा पाँचजनाभन्दा बढी जम्मा हुन नपाउने गरी निषेधाज्ञा लगाइएको हो।
यस्तै शुक्रबार राति ८ बजेदेखि शनिबार बिहान ६ बजेसम्म उपमहानगर क्षेत्रभित्र चार किल्लामा कर्फ्यू आदेश जारी गरिएको छ।
यसअघि स्थानीय प्रशासनले शान्ति सुरक्षा कायम गर्न मंगलबार दिउँसो १ बजेदेखि लगाएको कर्फ्यू बिहीबार दिनभरका लागि (बिहान ८ बजेदेखि बेलुकी ८ बजेसम्म) हटाएको थियो।
बिहीबार बेलुकी ८ देखि शुक्रबार बिहान ६ बजेसम्म भने कर्फ्यू लगाइएको थियो।
सामाजिक सञ्जालमा आएका विषयमा हिन्दु र मुस्लिम समुदायबीच सद्भाव भड्किन लागेपछि नेपालगञ्जमा कर्फ्यू लगाइएको हो।
असोज १९, २०८० शुक्रबार ०७:४४:५४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
