फिल्म 'भष्मे डन'मा विपिन त भष्मे भइहाले, सौगात मल्लको क्यारेक्टर के हो?

काठमाडौँ : फिल्म 'पशुपति प्रसाद २ : भष्मे डन' मा अभिनेता सौगात मल्लले समेत अभिनय गरेका छन्। विपिन कार्की लगायतका कलाकारहरूको चरित्र के हो प्राय सार्वजनिक भइसके पनि सौगातको क्यारेक्टर भने गोप्य नै रहन सफल भएको छ।

फिल्म प्रमोशनकोक्रममा निर्माण टिमले बल्ल शुक्रवार सौगातको क्यारेक्टर लुक्स भएको पोस्टर सार्वजनिक गर्यो। पोस्टरमा उनी टाउकोमा फेटा बाँधेको अवतारमा छन्। तर त्यसले पनि उनले फिल्ममा निभाएको चरित्र भने खुलाउँदैन।

पशुपति प्रसादमा खगेन्द्र लामिछाने र विपिनको क्यारेक्टरबिचको द्वन्द्व समेटिएको थियो। यसको सिक्वेलमा विपिन र सौगातबिचको द्वन्द्व समेटिएको हुनसक्छ। सौगातको क्यारेक्टरलाई गोप्य राख्न निर्माण टिमले गरेको मिहेनतले पनि उनी फिल्ममा विपिनपछिको महत्त्वपूर्ण क्यारेक्टरमा रहेको सङ्केत गर्छ नै।

निर्माण टिमले यस अगाडि फिल्मको दुई वटा गीत सार्वजनिक गरिसकेको छ। दीपेन्द्र के खनालले निर्देशन गरेको फिल्ममा विपिन, सौगातसँगै स्वस्तिमा खड्का, रवीन्द्र सिंह बानियाँ, माओत्से गुरुङ, प्रकाश घिमिरे लगायतका कलाकारको अभिनय रहेको छ।

टुकी आर्ट्सको ब्यानरमा बनेको फिल्मको निर्माता खगेन्द्र लामिछाने हुन्।

असोज १२, २०८० शुक्रबार २२:३७:०७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।