सावित्राले गोल गरे पनि इजरायली लिगमा बराबरीमा रोकियो रानाना
काठमाडौं : नेपाली स्टार फुटबलर सावित्रा भण्डारी ‘साम्बा’ ले गोल गरे पनि हापोएल रानाना इजरायली लिगमा बराबरीमा रोकिएको छ।
इजरायली शीर्ष डिभिजन लिगको सिजनको दोस्रो खेलमा हापोएल रानानाले गएराति पेटा टिक्भा एफसीसँग १–१ गोलको बराबरीको खेल खेलेको हो।
खेलमा साम्बाले खेलको ६० औं मिनेटमा गोल गर्दै रानानालाई १-० को अग्रता दिलाएकी थिइन्। तर यसको ५ मिनेटपछि नै पेटा टिक्भाले बराबरी गोल फर्कायो।
इजरायली लिगमा दुई खेलमा साम्बाको यो पाँचौं गोल हो। यसअघिको खेलमा रानानाले रमाट हशारोनलाई ४-० ले हराउँदै सबै गोल साम्बाकै थियो।
बराबरीपछि रानानाको २ खेलमा ४ अंक छ भने पेटा टिक्भा ३ खेलमा ७ अंक सहित पहिलो स्थानमा छ।
भदौ २९, २०८० शुक्रबार ०९:३१:५३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
