एसिया कपमा आज श्रीलंकासँग समूह चरणको हारको बदला लिने बंगलादेशको योजना

एजेन्सी : एसिया कप क्रिकेटको सुपर फोर चरणको दोस्रो खेलमा आज (शनिबार) श्रीलंका र बंगलादेशबीच भिडन्त हुँदैछ।

श्रीलंकाको घरेलु मैदान कोलम्बोमा हुने यो खेल नेपाली समय अनुसार दिउँसो ३:१५ बजे सुरु हुनेछ। घरेलु मैदानको फाइदा उठाउँदै श्रीलंका सुपर फोरमा विजयी सुरुवात गर्ने तयारीमा छ।

यी दुवै टिम एकै समूह, समूह ‘बी’ बाट सुपर फोरमा पुगेका हुन्। जहाँ समूह चरणको खेलमा श्रीलंकाले बंगलादेशलाई पाँच विकेटले हराएको थियो। त्यो हारको बदला लिने दाउमा पनि आज बंगलादेश रहनेछ। 

श्रीलंका र बंगलादेशसँगै पाकिस्तान र भारत सुपर फोरमा पुगेका हुन्। जहाँ सबै टिमले एकअर्कोसँग खेलेपछि शीर्ष दुई टिम उपाधिका लागि फाइनलमा पुग्ने छन्।

सुपर फोरको पहिलो खेल हारेको बंगलादेश पहिलो जितको खोजीमा छ। सुपर फोरको पहिलो खेलमा पाकिस्तानले बंगलादेशलाई ७ विकेटले पराजित गरेको थियो।

एसिया कपमा सहभागी नेपाल र अफगानिस्तान भने समूह चरणबाटै बाहिरिसकेका छन्।

भदौ २३, २०८० शनिबार १३:४०:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।