एसिया कपको ओपनिङ सेरेमोनी टेलिभिजनमा प्रसारण नहुने

काठमाडौं : एसिया कपको ओपनिङ सेरेमोनी टेलिभिजनमा प्रसारण नहुने भएको छ।

बुधबारबाट पाकिस्तान र श्रीलंकामा हुन लागेको एसिया कपको ओपनिङ सेरेमोनी टेलिभिजनमा प्रसारण नहुने गायिका त्रिशाला गुरुङले जानकारी दिइन्।

गुरुङले नेपाल पाकिस्तानको खेलअघि मुल्तान क्रिकेट स्टेडियममा सांगीतिक प्रस्तुति दिनेछिन्। उनले रातो र चन्द्र सूर्य गीत गाउनेछिन्।

उनीसँगै पाकिस्तानी गायिका आइमा बेगले पनि उद्घाटनअघि सांगीतिक प्रस्तुति दिनेछिन्। तर यी दुवैको सांगीतिक प्रस्तुति भने टेलिभिजनमा नदेखाइने भएको छ।

अन्तर्राष्ट्रिय प्रसारण नीतिका कारण ओपनिङ सेरेमोनी प्रसारण नहुने उनले जानकारी दिइन्। गुरुङले आफूले छुट्टै उक्त भिडियो सामाजिक सञ्जालमा राख्नेसमेत बताएकी छन्।

ओपनिङ सेरेमोनी नेपाली समयअनुसार पौने ३ बजे र खेल सवा ३ बजेबाट सुरू हुनेछ।

भदौ १३, २०८० बुधबार ११:४३:०७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।