नेपाली टिमलाई कमजोर ठानेका छैनौँ : बाबर आजम

काठमाडौं : पाकिस्तानी क्रिकेट टिमका कप्तान बाबर आजमले नेपालको टिमलाई कमजोर नठानेको बताएका छन्।

नेपालसँगको खेलअघिको पत्रकार सम्मेलनमा पाकिस्तानी कप्तान बाबरले नेपालको टिमलाई कमजोर नठानेको बताएका हुन्।

उनले भने, ‘क्रिकेटमा कुनै पनि प्रतिस्पर्धीलाई कमजोर सोच्नुहुँदैन। नेपाललाई सजिलोसँग लिएका छैनौँ। ओपनिङ म्याच भएकाले राम्रो सुरुवा गर्न चाहन्छौँ।’

कप्तान बाबरले नेपालविरुद्धको खेलअघि पनि अन्य टिमसँग गर्ने जस्तै तयारी गरेको भन्दै नेपालको बलियो र कमजोर पक्षको बारेमा जानकार रहेको बताए।

‘अन्य टिमसँगको खेलमा जसरी तयारी गर्छौँ, नेपालविरुद्धको खेलमा पनि हामीले त्यसरी नै तयारी गरेका छौँ। योजना बनाएका छौँ, उनीहरूको कमजोरी र बलियो पक्षको बारेमा हामीले हेरेका छौँ।’

बाबरले एसिया कप पूरै पाकिस्तानमा भइदिएको भए राम्रो हुने भन्दै छुट्टाछुट्दै देशमा खेल भए पनि आफूहरू सबै ठाउँका लागि तयार भएको बताए।

भदौ १२, २०८० मंगलबार २०:०७:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।