बारा बस दुर्घटना : मृतक सबैको सनाखत, एक जना नेपाली र ६ भारतीय
![बारा बस दुर्घटना : मृतक सबैको सनाखत, एक जना नेपाली र ६ भारतीय](https://ukeraa.prixacdn.net/media/albums/bus_qWPTNLEz5V.jpeg )
मकवानपुर : बाराको जीतपुर सिमरा उपमहानगरपालिका–२२, चुरियामाईमा आज (बिहीबार) बिहान भारतीय तीर्थयात्री बोकेको बस दुर्घटना हुँदा मृत्यु भएका सातै जनाको पहिचान खुलेको छ।
दुर्घटनामा ज्यान गुमाउनेमा नेपालका एक जना, महोत्तरीको लोहारपट्टी का ४१ वर्षीय विजयलाल पण्डित रहेका छन्।
त्यसैगरी अन्यमा भारतको राजस्थानका ६७ वर्षीय बहादुर सिंह, ६५ वर्षीया मीरादेवी सिंह, ६० वर्षीया सत्यवती सिंह, ७० वर्षीय राजेन्द्र चतुरवेदी, ६५ वर्षीय श्रीकान्त चतुरवेदी र ६७ वर्षीया वैजन्ती देवी रहेका जिल्ला प्रहरी कार्यालय मकवानपुरका प्रहरी उपरीक्षक सीताराम रिजालले जानकारी दिए।
बसमा चालकसहित २६ यात्रु सवार थिए। दुर्घटनामा १७ जना घाइते भएका छन्। घाइतेको हेटौंडा अस्पताल, सञ्चो अस्पताल, चुरेहिल अस्पताल र चितवनस्थित पुरानो मेडिकल कलेज, भरतपुरमा उपचार भइरहेको छ।
दुर्घटना पश्चात् बसका चालक, सहचालक र अन्य एक जना सम्पर्कमा नआएको एसपी रिजालले बताए। उनीहरूको खोजी भइरहेको छ।
काठमाडौंबाट जनकपुरतर्फ जाँदै गरेको मधेस प्रदेश–०३–००१ ख ७९९४ नम्बरको बस आज बिहान २ बजे बाराको जितपुर सिमरा उपमहानगरपालिका–२२ पूर्वपश्चिम लोक राजमार्गको चुरियामाई मन्दिरबाट एक सय मिटर दक्षिणतर्फको खोलामा खसेर दुर्घटना भएको हो।
भदौ ७, २०८० बिहीबार १०:३२:०८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।