बारा बस दुर्घटना अपडेट : एक नेपालीसहित मृत्यु हुनेको संख्या ७ पुग्यो

बारा : बारामा तीर्थयात्री बोकेको बस दुर्घटनामा घाइते भएका एक जनाको उपचारका क्रममा मृत्यु भएको छ। योसँगै उक्त दुर्घटनामा परी ज्यान गुमाउनेको सङ्ख्या ७ पुगेको छ।

तीन जनाको घटनास्थलमा तथा चार जनाको उपचारका क्रममा मृत्यु भएको प्रहरी प्रवक्ता एवं प्रहरी नायव उपरीक्षक दधिराम न्यौपानेले जानकारी दिए।

काठमाडौंबाट जनकपुरतर्फ जाँदै गरेको मधेस प्रदेश ३००१ ख ७९९४ नम्बरको बस आज बिहान २ बजे बाराको जितपुर सिमरा उपमहानगरपालिका–२२ पूर्वपश्चिम लोक राजमार्गको चुरियामाई नजिक दुर्घटना भएको हो।

मृत्यु हुनेमा महोत्तरीको लोहारपट्टीका ४१ वर्षीय विजयलाल पण्डित तथा भारतको राजस्थानका ६७ वर्षीय बहादुर सिंह र ६५ वर्षीया मीरादेवी सिंह रहेका डीएसपी न्यौपानेले बताए।

बाँकी चार जनाको सनाखत हुन बाँकी छ। दुर्घटनामा तीन नेपाली तथा १४ भारतीय नागरिक घाइते भएका छन्। उनीहरू पशुपतिनाथको दर्शन गरी फर्किँदै थिए।

भदौ ७, २०८० बिहीबार ०९:०९:५० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।