मायमी यूएस ओपनको फाइनलमा, २ गोलले पछि परेको खेल उल्टाउँदै टाइब्रेकरमा जित

एजेन्सी : सानदार पुनरागमनसहित टाइब्रेकरमा खेल जित्दै इन्टर मायमी यूएस ओपन कप फुटबलको फाइनलमा प्रवेश गरेको छ।

अर्जेन्टिनी स्टार लिओनेल मेस्सीको कप्तानीमा रहेको इन्टर मायमीले २ गोलले पछि परेको अवस्थामा खेलमा फर्किँदै सिन्सिनाटिलाई  टाइब्रेकरमा ५-४ ले हरायो।

सिन्सिनाटिको घरेलु मैदानमा भएको खेलको निर्धारित समय २-२ र थप गरिएको अतिरिक्त समय पनि १-१ गोलको बराबरीमा सकिएपछि खेल टाइब्रेकरमा पुगेको थियो। 

खेलको ६७ औं मिनेटसम्म सिन्सिनाटिले खेलमा २-० को अग्रता कायम गरेको थियो। ६८ औं मिनेटमा काम्पानाले मायमीको लागि एक गोल गर्दा इन्ज्यूरी समयको सातौं मिनेटमा उनले नै बराबरी गोल फर्काए। दुवै गोलमा मेस्सीको असिस्ट थियो।

२-२ को बराबरीपछि अतिरिक्त समयमा गएको खेलमा पहिलो हाफमै मायमीले मार्टिनेजको गोलमार्फत ३-२ को अग्रता पनि बनायो। तर ११४ औं मिनेटमा सिन्सिनाटिले पनि बराबरी गोल फर्कायो। यसपछि खेल टाइब्रेकरमा पुगेको थियो।

टाइब्रेकरमा मायमीका पाँचै जना खेलाडीले गोल गरे भने सिन्सिनाटिको पाँचौं पेनाल्टीलाई मायमीका किपरले बचाएपछि मायमीले खेल जित्दै अन्तिम दुईमा स्थान पक्का गर्यो।

यसै साता लिग्स कपको फाइनल पनि सडन डेथमा जित्दै मायमीले इतिहासकै पहिलो उपाधि जितेको थियो।

भदौ ७, २०८० बिहीबार ०९:०२:०१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।