मैले समय छुट्याएँ तर स्टार स्पोर्ट्सले अरुलाई नै छान्यो : क्रिकेट कमेन्टेनर एन्ड्रु
काठमाडौं : नेपाली क्रिकेटप्रेमीमाझ चर्चित आयरल्यान्डका क्रिकेट कमेन्टेटर एन्ड्रु लियोनार्डले एसिया कपको कमेन्ट्रीमा नदेखिने भएका छन्।
शुक्रबार एसिया कपको आधिकारिक ब्रोडकास्टर स्टार स्पोर्ट्सले छानेको क्रिकेट कमेन्टेटरको सूचीमा उनी नअटाएका हुन्।
नेपाली क्रिकेटबारे जानकार एन्ड्रुले एसिया कपको नेपाल सम्मिलित समूह चरणको खेलमा कमेन्ट्री गर्ने आँकलन नेपाली फ्यानहरूले गरेका थिए।
स्टार स्पोर्ट्सको कमेन्टेटरको सूचीमा नपरेपछि उनले आफूले समय निकाले पनि टिभीले अरुलाई नै छानेको बताएका छन्।
‘मैले एसिया कपको लागि समय छुट्याएको थिएँ, खासगरी नेपाल सम्मिलित दुईवटा समूह चरणको खेलका लागि,’ उनले भने, ‘तर, स्टार स्पोर्ट्सले अरुलाई नै छान्यो।’
आफू यो प्रतियोगिताको लागि उत्साहित रहेको भन्दै उनले नेपाली क्रिकेटरले राष्ट्रलाई गौरवान्वित बनाउनेमा विश्वस्त रहेको बताए। उनले पाकिस्तान र भारतसँगको दुई खेल ऐतिहासिक भएको बताएका छन्।
एन्ड्रुले एसिया कपको प्रत्येक बललाई पछ्याउने भन्दै काठमाडौं नै आउनसक्ने संकेतसमेत गरे।
भदौ २, २०८० शनिबार १८:२९:४५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
