रोल मोडल बन्छु भन्ने मिस नेपाल वर्ल्ड बलात्कार अभियुक्त बाबाको अनुयायी

काठमाडौँ : सन् २०२२ का लागि मिस नेपाल वर्ड चुनिएपछि प्रियंका रानी जोशीले*  आफ्ना अन्तर्वार्ताहरूमा समाजका लागि रोल मोडल बन्ने प्रयास गर्ने दाबी गरिन्।

तर उनै जोशी धर्मको आडमा आफ्नै अनुयायीको बलात्कार गरेको जस्तो गम्भीर अपराधका अभियुक्त सिद्ध बाबा भनिने कृष्णबहादुर गिरीको अनुयायी बनिन्।

उकेराले प्राप्त गरेको जोशीहितको तस्बिरमा उनी गिरीको आश्रममा पुगेकी मात्रै छैनन् गिरीले आफ्ना अनुयायीहरूलाई लगाइदिने टिका लगाएर चरणकमलमा परेकी छिन्।

यी उनै बाबा हुन् जो माथि आफ्नै अनुयायीलाई आश्रममा बोलाएर बलात्कार गरेको आरोप छ। पहिला जिल्ला अदालत सुनसरीले सहमतिमा नै शारीरिक सम्बन्ध भएको ठहर गर्दै गिरीलाई २०७७ मङ्सिर २२ गते सफाइ दिने फैसला गरेको थियो।

तर उच्च अदालत विराटनगरले जिल्लाको सो फैसला बदर गरेर सबुद प्रमाण बुझेर इन्साफ गर्न सुरु जिल्ला अदालतमा नै मुद्दा फिर्ता पठाएको थियो।

जिल्ला अदालतको फैसला उल्टिए लगत्तै गिरी बलात्कारका अभियुक्त भए। तर देशकै प्रतिनिधित्व गर्छु भनेर गफ दिने मिस नेपाल वर्ल्ड जोशी उनै अभियुक्तको चरणमा परेकी छिन्।

*समाचारमा प्रियंका रानी जोशी हुनुपर्नेमा भुलवस श्रीच्छा प्रधान भएकाले माफी सहित नाम सच्याइएको छ।

साउन ३१, २०८० बुधबार १६:०८:२३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।