विश्वविद्यालयसँग संयुक्त अनुसन्धान परियोजनाहरूमा सहकार्य गर्न चन्द्र ढकालको प्रस्ताव

ललितपुर :नेपाल उद्योग वाणिज्य महासङ्घका अध्यक्ष चन्द्रप्रसाद ढकालले उद्योग वाणिज्य क्षेत्र र विश्वविद्यालय बिचको साझेदारीले अनुसन्धान, नवप्रवर्तन र दक्ष जनशक्ति विकासमा  योगदान पुग्ने बताएका छन्।

सोमबार ललितपुरमा मदन भण्डारी विज्ञान तथा प्रविधि विश्वविद्यालयले आयोजना गरेको कार्यक्रमलाई सम्बोधन गर्दै उनले विज्ञान र प्रविधिको क्षेत्रमा उच्च शिक्षा अध्ययन तथा अनुसन्धानमा समर्पित विश्वविद्यालयसँग साझेदारी गर्न महासङ्घ तयार रहेको बताएका हुन्।

'उद्योग व्यवसाय क्षेत्रमा चुनौती छन्। त्यस्ता चुनौतीहरूको  समाधानका लागी उद्योग वाणिज्य महासङ्घ र विश्वविद्यालयबिच सहकार्य गर्दा पक्कै पनि नयाँ बाटो खुल्ने छ। यसबाट अन्य क्षेत्र पनि साझेदारीका लागि प्रेरित हुने छ' उनले भने।

अध्यक्ष ढकालले महासङ्घ र मदन भण्डारी विज्ञान तथा प्रविधि विश्वविद्यालयबिच  डेढ दर्जन क्षेत्रहरूमा साझेदारी गर्न सकिने उल्लेख गरेका थिए।

उनले संयुक्त अनुसन्धान परियोजनाहरूमा सहकार्य गर्ने, उद्योगहरूबाट प्राप्त व्यावहारिक अनुभवहरू सहितको पाठ्यक्रम विकासमा काम गर्ने, विद्यार्थीहरूलाई इन्टर्नसिपहरू र कम्पनीहरूमा काम गर्ने अवसर सृजना गर्ने तथा नयाँ प्रविधिको व्यवसायीकरणका लागि उद्योगहरूमा हस्तान्तरण गर्ने व्यवस्था मिलाउन सकिने उनले बताए।

महासङ्घ व्यावसायिक संस्था मात्र नभई सरकार र सरोकारवालाहरूलाई सल्लाह दिने थिंक ट्याङ्क भएकाले विश्वविद्यालयसँग मिलेर संयुक्त कार्यशाला र प्रशिक्षण कार्यक्रमहरू सञ्चालन गर्न सकिने,अनुसन्धान अनुदान तथा छात्रवृत्तिका लागि कोष स्थापनमा सघाउन तयार रहेको अध्यक्ष ढकालले बताए।

बिजनेस इन्क्यूबेटर, एक्सेलेटर र इनोभेसन सेन्टर स्थापना तथा सार्वजनिक-निजी-विश्वविद्यालय साझेदारीमा विश्व स्तरीय परीक्षण प्रयोगशालाहरू स्थापना गर्न सके यसले नेपालको निर्यात बढाउन मद्दत गर्ने उनले बताए।

बदलिँदो प्रविधिलाई उपयोग गर्ने गरी  आर्टिफिसियल इन्टेलिजेन्सका क्षेत्रमा  प्रभावकारिता र दक्षता बढाएर नवीन उत्पादन र सेवाहरू  दिन सक्ने अवस्थाका लागि पनि विश्वविद्यालयसँग गहन साझेदारीको प्रस्ताव गरिएको अध्यक्ष ढकालले बताए।

साउन २२, २०८० सोमबार २१:०९:१९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।