म र गुल्सन झाले सँगै सन्यास लिन्छौँ : रोहन मुस्तफा
काठमाडौं : युएईको राष्ट्रिय टिमका अलराउन्डर क्रिकेटर रोहन मुस्तफाले गुल्सन झासँगै सन्यास लिने बताएका छन्।
शुक्रबार नेपाली क्रिकेट टिमका पूर्व कप्तान ज्ञानेन्द्र मल्लले सन्यासको घोषणा गरेको विषयमा गरेको पोस्टको कमेन्टमा उनले यस्तो बताएका हुन्।
मल्लले सन्यास घोषणा गरेपछि मुस्तफाले फेसबुकमार्फत भविष्यको लागि कामना गर्दै मुस्कान सधैँ मिस गर्ने बताएका छन्।
उनले लेखेका छन्, ‘नेपाल क्रिकेटमा तपाईंको योगदान कहिल्यै बिर्सने छैन। अझ एक खेलाडी तपाईं महान व्यक्ति हुनुहुन्छ। तपाईंको अनुहारमा मुस्कान सधैं मिस हुनेछ भाइ। भविष्यको लागि शुभकामना।’
मुस्तफाको पोस्टमा एक नेपाली फ्यानले अब तपाईंको पालो भन्दै कमेन्ट गरेका थिए। त्यसको रिप्लाइ दिँदै उनले आफू र गुल्सन झाले सँगै सन्यास घोषणा गर्ने बताएका हुन्। त्योसँग अन्त्यमा उनले हाँसोको इमोजीसमेत राखेका छन्।
उनले लेखेका छन्, ‘मसँग समय छ। म र गुल्सन झाले सँगै सन्यास लिनेछौँ।’
मुस्तफा नेपाली फ्यान फलोइङ भएका युएईका खेलाडी हुन्। उनी सामाजिक सञ्जाल टिकटकमा समेत सक्रिय छन्। उनले टिकटकमा लाइभ बस्दै नेपाली फ्यानहरुसँग पनि साक्षात्कार गर्ने गर्छन्।
साउन १९, २०८० शुक्रबार २१:४५:५९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
