पाँच मिनेटभित्र दुई गोल गर्दै हारबाट जोगियो अर्जेन्टिना

फिफा महिला विश्वकपमा अर्जेन्टिनाले लगातार निराशाजनक प्रदर्शन जारी राखेको छ। 

समूह चरणको पहिलो खेलमा इटालीसँग १-० गोलअन्तरले हारेको अर्जेन्टिना दोस्रो खेलमा पनि जितविहीन भएको छ। आज बिहान सकिएको खेलमा अर्जेन्टिना दक्षिण अफ्रिकासँग २-२ को बराबरीमा रोकिएको हो। 

तर अर्जेन्टिनाले पाँच मिनेटभित्र २ गोल गर्न सफल भयो। खेलको ३० औं मिनेटमा दक्षिण अफ्रिकाकी लिन्डा मोथालोले गोल गर्दै अग्रता दिलाएकी थिइन्। पहिलो हाफमा १-० ले पछि परेको अर्जेन्टिनी महिला टिमले दोस्रो हाफमा पुनः एक गोल खायो। ६६ औं मिनेटमा थेम्बी गात्लानाले गोल गर्दै दक्षिण अफ्रिकालाई जिततर्फ डोहोर्याएकी थिइन्। 

तर सोफिया ब्राउन र रोमिना नुनेजले क्रमशः ७४ र ७९ औं मिनेटमा गोल गर्दै अर्जेन्टिनाको हार टारे। 

बराबरीपछि अर्जेन्टिनाले र दक्षिण अफ्रिका दुवैले समूह चरणमा १/१ अंक बनाएका छन्। यी दुई टिम रहेको समूह 'जी' मा इटली र स्विडेन पनि छन्। 

दक्षिण अफ्रिकाले यसअघि समूह चरणमा स्वीडेनसँग २-१ गोलअन्तरले पराजय भोगेको थियो। 

फिफा महिला विश्वकप २०२३ का खेलहरू अष्ट्रेलिया र न्युजिल्याण्डमामा भइरहेका छन्। 

साउन १२, २०८० शुक्रबार ०९:२०:५९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।