दीपेन्द्रको अलराउण्डर प्रदर्शन, मोन्ट्रियल टाइगर्सको शानदार जित

नेपाली खेलाडी दीपेन्द्र सिंह ऐरी सम्मिलित मोन्ट्रियल टाइगर्सले ग्लोबल टी-२० क्यानडा क्रिकेट लिगमा तेस्रो जित निकालेको छ। 

मोन्ट्रियल टाइगर्सले भ्यानकौभर नाइटलाई ११ बल बाँकी छँदै ६ विकेट पराजित गर्न सफल भयो। नाइटले दिएको १४९ रनको लक्ष्य मोन्ट्रियलले ४ विकेट गुमाउँदै भेट्टाएको थियो। 

बुधबार बिहान भएको खेलमा दीपेन्द्रले २२ बलमा अविजित २२ रन बनाए। दीपेन्द्रले शेर्फन रुथरफोर्डसँग पाँचौँ विकेटका लागि अविजित ८६ रनको साझेदारी गरे। 

उक्त खेलमा ३ ओभर बलिङ गरेका दीपेन्द्रले १ विकेट लिएर जम्मा १६ रन दिएका थिए। उनको अलराउण्डर प्रदर्शनका कारण टाइगरले जित निकाल्न सक्यो। 

उक्त खेलमा रुथरफोर्डले ५३ बलमा नटआउट ८४ रन बनाएका थिए। प्लेयर अफ दी म्याच भएका रुथरफोर्डले यस क्रममा ७ चौका र ६ छक्का बनाएका थिए। दीपेन्द्रले पनि २२ रन बनाउने क्रममा २ चौका प्रहार गरेका थिए। 

साउन १०, २०८० बुधबार ०८:२२:११ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।