बिनासेटिङ यति ठूलो मात्रामा सुन तस्करी हुनै सक्दैनः रवि लामिछाने
विराटनगर : राष्ट्रिय स्वतन्त्र पार्टी (रास्वपा) का सभापति रवि लामिछानेले बिनासेटिङ सुन तस्करी हुनै नसक्ने दाबी गरेका छन्।
सेटिङ नभई यति ठूलो परिमाणको सुन तस्करी हुन सम्भव नरहेको उनको भनाइ छ।
विराटनगरमा आइतबार पत्रकारहरूसँग कुरा गर्दै रास्वपा सभापति लामिछानेले भने, ‘बिनासेटिङ, मिलेमतो नभई सुन तस्करी सम्भव नै छैन।’ तर उनले कुन लेबलको, कुन ढंगको तस्करी हो भन्ने विषयमा भने अनुसन्धान गर्नुपर्ने बताए।
सुन बरामद प्रकरणमा अनुसन्धान भइरहेकाले यस विषयमा थप टिप्पणी गर्न जरुरी नभएको उनको भनाइ छ।
‘तस्करीका विषयमा अनुसन्धान जारी छ। एमालेले गृहमन्त्रीको राजीनामा माग्यो भन्दैमा हामीले पनि त्यसै गर्नुपर्छ भन्ने छैन। अनुसन्धान नहुँदै राजीनामा माग्नु उचित होइन्,’ लामिछानेले भने।
अनुसन्धान नसकिँदासम्म रास्वपाले धैर्य गर्ने र वास्तविकता थाहा पाएपछि मात्र आवाज उठाउने उनले बताए। वास्तविकता बाहिर आइसकेपछि चित्त बुझेन भने सडक र सदन दुवै थलोमा कुरा राख्ने लामिछानेले प्रस्ट पारे।
साउन ६, २०८० शनिबार ११:१२:५४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
