रिहा भएपछि वानएक्स बेटको प्रचारका अभियुक्त कलाकारहरू भन्छन्– गल्ती भयो, अब गर्दैनौं

काठमाडौं : बुधबार साँझ काठमाडौं जिल्ला अदालतले वानएक्स बेट प्रकरणमा पक्राउ परेका कलाकार र युट्युबरलाई धरौटीमा रिहा गर्न आदेश दियो।

अनलाइन सट्टेबाजी गराउने वेबसाइट वानएक्स बेटको प्रचार गरेको आरोपमा कलाकारहरू मरिचमान श्रेष्ठ (बल्छी धुर्वे), राजु पौडेल (राजु मास्टर) सहितका कलाकारलाई अदालतले ५ हजार रुपैया धरौटीमा छाड्न आदेश दिएपछि रिहा भएका हुन्।

रिहा हुनेमा बल्छी र राजु मास्टर सहित जलन घर्तीमगर, अलिश राई गणेश देवकोटा, बेगम नेपाली, पवन खतिवडा (क्याकुरी)र सरोज घिमिरे रहेका छन्।

रिहा भएपछि पवन खतिवडाले आफुहरूबाट गल्ती भएको र आइन्दा त्यस्तो नगर्ने बताए। उनले अब छिट्टै काममा फर्किने जानकारी दिए।

अलिश राईले आफ्नो कर्मले जेलसम्म पुग्नुपरेको बताए।

‘मेरो कर्म भनुँ न अब आफूले गरेको गल्तीको महसुस भयो,’ उनले हाँस्दै भने, ‘अहिले यसमा बोल्ने अवस्थामा छैन म।’

यसबाहेक अन्य कलाकारले तत्काल नबोल्ने बताएका छन्। बल्छी धुर्बेले तत्काल आफू यस विषयमा नबोल्ने र केहि दिनबाट नै कामलाई निरन्तरता दिने बताए।

सोही क्रममा सट्टेबाजी गराउने एजेन्ट भनिएका दिनेश खड्का र अनिता धिताललाई अदालतले १० लाख रूपैयाँ धरौटी बुझाउन अदालतले भनेको छ। उनीहरू गत जेठ ३२ गते पक्राउ परेका थिए।

असार २७, २०८० बुधबार २२:०६:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।