हृदयघातका कारण नेकपा एस पाल्पाका अध्यक्ष पाण्डेयको निधन

पाल्पाः नेपाल कम्युनिस्ट पार्टी (एकीकृत समाजवादी) पाल्पाका जिल्ला अध्यक्ष खिमानन्द पाण्डेय (कमल) को मृत्यु भएको छ। 
       
बगनासकाली गाउँपालिका-१ पिप्लेस्थित घरबाट उपचारका लागि लुम्बिनी मेडिकल कलेज प्रभास लैजाने क्रममा बाटोमै मृत्यु भएको हो।

शुक्रबार साँझ ६ः१५ बजे हृदयघाट भई ५२ वर्षीय पाण्डेयको उपचारका लागि लुम्बिनी मेडिकल कलेज लगिएकोमा ६ः४५ बजे अस्पतालले मृत्यु घोषणा गरेको पारिवारिक स्रोतले जनाएको छ। 

पाण्डेयका दुई छोरा र श्रीमती छन्। पाण्डेयको २६ वर्षीय माहिलो छोराको पनि गत वर्ष हृदयघाटबाटै मृत्यु भएको थियो। पूर्वएमाले पाल्पाको उपसचिव रहेका पाण्डेय पाल्पामा सरल र स्वच्छ छवि बनाएका नेतामा पर्छन्। 

उनी गत वर्ष सम्पन्न भएको स्थानीय तहको निर्वाचनमा बगनासकाली गाउँपालिकामा उपाध्यक्षको उम्मेदवार बनेका थिए। 

पाण्डेयको पार्थिव शरीरलाई श्रद्धाञ्जलिका शनिबार बिहान साढे आठ बजे तानसेन टुँडिखेलमा राखिने र रामनदी घाटमा अन्त्येष्टि गरिने पार्टीले जनाएको छ। 

असार २३, २०८० शनिबार ०८:०९:१८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।